Túrkistan oblysynan «Qazaqstan barysyna» qatysatyn balýandar belgili boldy

TÚRKІSTAN. QFAZaQPARAT - Túrkistan oblysy, Shardara qalasynda Qazaqstan Respýblıkasynyń Tuńǵysh Prezıdenti - Elbasy N.Á.Nazarbaevtyń júldesine arnalǵan qazaq kúresinen «Qazaqstan barysy» respýblıkalyq týrnıriniń oblystyq irikteý jarysy ótti, dep habarlaıdy QazAqparat oblys ákiminiń baspasóz qyzmetine silteme jasap.

Jarysta aýdandyq jáne qalalyq irikteýlerde fınalǵa shyqqan 32 balýan baq synady. Saıystyń ashylý saltanatynda Shardara aýdanynyń ákimi Bolatbek Qystaýov balýandarǵa sáttilik tilese, sport ardageri Baqyt Jańbyrbaev izbasarlaryna aq batasyn berdi. Oblystyq dene shynyqtyrý jáne sport basqarmasynyń basshysy Polat Qyryqbaev úzdik sportshylarǵa jaǵdaı jasalatynyn, olar respýblıkalyq, halyqaralyq syndarǵa qatysatynyn jetkizdi.

Túrkistan oblystyq dene shynyqtyrý jáne sport basqarmasynyń uıymdastyrýymen, Shardara aýdany ákimdiginiń qoldaýymen ótken jarysta Túrkistan qalasynyń balýany Beıbarys Ábdiǵanı qarsylas shydatpaı, «Túrkistan barysy» atandy. Jeńimpazǵa arnaıy belbeý, aqtyq saıysqa joldama jáne Shardaranyń sport janashyrlary atynan jańa «Neksııa» avtokóligi syıǵa tartyldy.

«2-oryn alǵan Kentaý qalasynyń balýany Jamalhan Darhanǵa arnaıy belbeý, aqtyq saıysqa joldama jáne 300000 teńgeniń sertıfıkaty tapsyryldy. Al 3-oryn alǵan Otyrar aýdanynyń balýany Ábildauly Sabyrjan arnaıy belbeý men 100000 teńgege ıe boldy. «Jeńiske degen jigeri úshin» Báıdibek aýdanynyń balýany Sirgebaı Ernazarǵa, «Kórermen kózaıymy» nomınatsııasy boıynsha Saryaǵash aýdanynyń balýany Ábdimálik Muhtarǵa baǵaly syılyqtar berildi. Jalpy barlyq qatysýshylarǵa estelik syılyqtar tabystaldy» delingen habarlamada.

Jarystyń jabylý saltanatynda Túrkistan oblystyq dene shynyqtyrý jáne sport basqarmasynyń basshylyǵy jarysty joǵary deńgeıde ótkizýge atsalysqan Shardara aýdanynyń ákimdigi men Arman Qarsybaev bastaǵan sport janashyrlaryna alǵys aıtyp, «Qazaqstan barysyna» joldama alǵan qos balýanǵa jeńis tiledi.