Túrkistan oblysynan qańly dáýirine tıesili qundy jádigerler tabyldy

TÚRKІSTAN. QazAqparat - Túrkistan oblysynan qańly dáýirine tıesili qundy jádigerler tabyldy. Bul týraly Túrkistan óńirlik kommınkatsııa qyzmeti málimdedi, dep habarlady QazAqparat tilshisi.

Ońtústik Qazaqstan Memlekettik Pedagogıkalyq ýnıversıtetiniń arheologııalyq jasaǵy «Ordabasy» memlekettik tarıhı-mádenı qoryǵynyń qyzmetkerlerimen birlese otyryp, qańly dáýirine tıesili kóne qorym ornyn tapty. Ashyq aspan astyndaǵy nysan Ordabasy aýdanyna qarasty Qaraspan aýyly mańyndaǵy ornalasqan.

Qorymdaǵy dálizdiń uzyndyǵy 8,5 metr bolsa, tereńdigi - 4 metr quraıdy. Jerleý kamerasynyń tereńdigi - 5,2 metr. Mamandardyń aıtýynsha, mundaı tereńdiktegi qorymdar buryn-sońdy bul aımaqta kezdespegen.

Sondaı-aq, arheolog ǵalymdar júrgizgen qazba jumystarynyń barysynda Saryaryq aýyly mańyndaǵy úńgirden 2 myń jyl burynǵy altyn syrǵa taýyp alǵan. Bul qundy áshekeıdiń jer astynda jatqanyna qansha jyl ótse de synyn joǵaltpapty. Sondaı-aq, kóne qorymnan 400 monshaqtan turatyn alqa men kúmis saqına jáne kirpik boıaýǵa arnalǵan buıymdar shyqqan. Odan bólek, qazba jumystarynyń barysynda keramıkalyq zattar da tabyldy.

«Júrgizilgen ǵylymı zertteýler qorymdaǵy er azamattyń, áıeldiń jáne jas óskinniń súıegi osydan 2 myń jyl buryn jerlengen degen dáıekti dálelderdi kórsetti. Qorymnan tabylǵan zattar – sol dáýirdegi qańly taıpasynyń aýqatty ómir súrgendigin aıǵaqtaıdy» - deıdi arheolog Aleksandr Podýshkın.