Túrkistan oblysynan Astanaǵa 500 tonna azyq-túlik jóneltildi
TÚRKІSTAN. QazAqparat - Túrkistan oblysynan Astanaǵa azyq-túlik ónimderi tıelgen kerýen attandy. 496 tonna aýyl sharýashylyǵy taýarlary qyrkúıek aıynyń 22-23 kúnderi Elordadada ótetin Túrkistan oblysy taýaróndirýshileriniń kezekti jármeńkesinde saýdalanady, dep habarlaıdy QazAqparat tilshisi.
Astana qalasynyń 20 jyldyq merekesine oraı uıymdastyrylyp otyrǵan sharaǵa jalpy quny 201 mln teńgeni quraıtyn azyq-túlik ónimderi joldandy. Atap aıtqanda, 80 tonna et ónimderi, 141 tonna kókónis, 28 tonna sút jáne 90 tonna baqsha ónimderi, 53 tonna jemis-jıdek, 26 tonna kartop jóneltildi.
Sondaı-aq, 10 myń dana jumyrtqa jáne 5 tonna balyq, 4 tonna bal, 10 tonna keptirilgen jemis, 14 tonna túrli konserviler jáne 45 tonna basqa da ónimder bar. Oblystyq aýyl sharýashylyǵy basqarmasy basshysynyń mindetin ýaqytsha atqarýshy Nurbek Badyraqovtyń aıtýynsha, jármeńkedegi taýarlar bazar narqynan 10-15 paıyz tómen baǵada satylmaq.
«Otandyq ónimderimiz qala turǵyndary men qonaqtaryna jármeńke arqyly usynylady. Túrkistan oblysy Astana qalasynyń 20 jyldyq merekesi aıasynda osymen 4-shi ret jármeńke ótkizip otyr. Osy aralyqta Elordaǵa 14 753 tonnany quraıtyn aýyl sharýashylyǵy ónimderiniń 28 túri jóneltildi. Osy sharany ótkizýge óńirimizdiń 35 iri jáne qosalqy sharýa qojalyqtary men kásiporyndary atsalysýda», - dedi Nurbek Badyraqov.
Jalpy, bıyl túrkistandyq sharýalar 500 myń tonnaǵa jýyq ónimdi Reseı, Belarýs, Latvııa, Germanııa memleketterine eksporttasa, 1 mln tonna taýar elimizdiń soltústik óńirlerine jóneltildi.
