Túrkistan oblysynan 70-ke jýyq turǵyn soltústikke attandy
TÚRKІSTAN. QazAqparat - Túrkistan oblysynyń 70-ke jýyq turǵyny soltústik óńirlerge attandy, dep habarlaıdy Túrkistan oblysy ákiminiń baspasóz qyzmeti.
Mundaǵy maqsat - jumys kúshi tapshy óńirlerge qonys aýdarý. Túrkistandyqtardyń ishinde soltústik óńirde turaqtap, jumys isteý úshin túbegeıli sheshim qabyldaǵan turǵyndar da jeterlik. Soltústikke qonys aýdarýdy qoldaıtyn memlekettik baǵdarlama qolǵa alynǵan 3 jyldyń ishinde óńirden 700-den astam otbasy kóship barǵan. Byltyrdyń ózinde 500-ge jýyq otbasy jumys kúshi tapshy óńirlerge qonys aýdarǵan.
Qonys aýdarýshylarǵa memleketten qoldaý zor. Túrkistan oblysy jumyspen qamtý jáne áleýmettik baǵdarlamalar basqarmasy basshysynyń orynbasary Turar Qudaıbergenovtiń málimetinshe, baǵdarlama qatysýshylaryna turǵyn úıdi jaldaý men kommýnaldyq qyzmetterge aqy tóleý shyǵyndary da tólenedi. Sondaı-aq, árbir otbasy múshesine bir rettik 35 AEK mólsherinde materıaldyq kómek beriledi.
Mamandardyń aıtýynsha, qazir soltústikte 3 myńnan asa bos jumys orny bar. Qonys aýdarýshylar sany jyldan-jylǵa ósip kele jatqandyqtan teriskeı óńiri turǵyn úı qurylysyna da qarqyn berip otyr.
Aıta keteıik, jyl sońyna deıin oblystan eńbek kúshi tapshy óńirlerge 1500-den asatyn múshesi bar 400 otbasy qonys aýdarady dep kútilýde. Qazir salaǵa jaýapty mmandar soltústikke kósh boıynsha aýyldyq eldi mekenderde nasıhat jumystaryn júrgizýde.
