Túrkistan oblysyna túrik kompanııalary 625 mln dollar ınvestıtsııa salady
Túrkistan oblysynan arnaıy delegatsııany aımaq basshysynyń orynbasary Erbol Tasjúrekov bastap bardy. Túrkistandyq kásipkerler túrkııalyq iri holdıngter men kompanııalar basshylarymen kelissózder júrgizdi.
Túrik ınvestorlaryna Túrkistannyń ınvestıtsııalyq tartymdylyǵy joǵary ekenin aıtyldy. Birlesip damytatyn jáne keńeıtýge bolatyn jeńil ónerkásip pen agroónerkásiptik keshen, týrızm sııaqty salalar tanystyryldy. Nátıjesinde sátti bıznes jasaýda 30 jyldan astam tarıhy bar túrkııalyq «DAL Holding Investment Company» holdıngi Túrkistan oblysynyń 200 ga jer aýmaǵynda ınvestıtsııalyq quny 500 mln. AQSh dollaryn quraıtyn jylyjaı salatyn boldy.
Jobany júzege asyrý barysynda jylyjaı aýmaǵynda tońazytqysh kókónis qoımasy salynyp, myńnan astam jumys orny ashylady dep kútilýde. Túrik eliniń taǵy bir «Dilmen Dekorasyon inş. Taah. Tic. Ltd Şti» kompanııasy 2019 jyly Túrkistan oblysynda jıhaz shyǵaratyn fabrıkanyń qurylysyn bastamaq. Jobaǵa sáıkes tartylatyn ınvestıtsııa kólemi 5 mln. AQSh dollaryn quraıdy. Qosymsha 130-dan astam jumys orny paıda bolady. Al, balamaly jáne jańartylatyn energııa kózderin damytý baǵyty boıynsha «Çalık Enerji» jáne «Zorlu Holding - Zorlu Enerji» atty eki iri túrik kompanııasy 50 MVt qýaty bar kún elektr stantsııalaryn salamyz dep otyr.
Osy maqsatta olar jalpy quny 120 mln AQSh dollary kóleminde ınvestıtsııa quıýǵa daıyn ekendikterin bildirdi. Kezdesýler men kelissózder qorytyndysy boıynsha Túrkistan oblysy ákimdigi men iri túrik kompanııalarynyń arasynda jalpy ınvestıtsııa kólemi 625 mln. AQSh dollaryn quraıtyn 4 memorandým túzildi. Qos tarap bul memorandýmdar Qazaqstan jáne Túrkııa elderindegi bıznestiń básekege qabilettiligin arttyrýdyń mańyzdy mehanızmine aınalatyndyǵyna senimdi. Sondaı-aq, tyǵyz kommertsııalyq baılanystardy damytyp, ekijaqty ınvestıtsııalar kóleminiń ulǵaıýyna jáne tehnologııalar transfertine negiz bolady dep otyr.
