Túrkistan oblysyna ózge óńirden kelgender mindetti túrde medıtsınalyq tekserýden ótedi
TÚRKІSTAN. QazAqparat – Túrkistan oblysynda koronavırýs pandemııasymen kúreste ákimdik qyzmetkerleri men dárigerler, quqyq qorǵaý organdary júıeli jumys atqarýda. Óńirde osy baǵytta profılaktıkalyq jáne uıymdastyrý jumystary júrgizilýde, dep habarlaıdy QazAqparat tilshisi.
Aıta keteıik, 20 naýryz kúni Nur-Sultan qalasynan Shymkentke kelgen 24 jastaǵy jigitten koronavırýs ınfektsııasy tabyldy.
Osy oraıda Nur-Sultan-Shymkent baǵytyndaǵy 646 FNB 13 nómirli avtobýspen kelgen jolaýshylardyń aty-jóni anyqtaldy.
Qoǵamdyq kóliktiń jolaýshylaryna óz erkimen jergilikti medıtsına mekemelerine baryp, tekserilý talap etilýde. Olarǵa tótenshe jaǵdaı kezinde aýyrǵanyn jasyryp, ózgelerge vırýs juqtyrý - QR Qylmystyq kodeksi boıynsha jaýapkershilikke tartylatyny eskertilgen. Búgin bul týraly oblys ákimdigi janynan qurylǵan sıtýatsııalyq ortalyqta Túrkistan oblysy ákiminiń orynbasary Sáken Qalqamanov málim etti.
«Sizder, ınfektsııanyń aldyn alý jáne onymen kúres boıynsha barlyq málimetti 109 koll ortalyǵyna qońyraý shalyp nemese Túrkistan oblysy ákimdiginiń «Túrkistan COVID-19 oblystyq shuǵyl aqparat taratý shtaby» paraqshasynan bile alasyzdar. Bárimizdi qazir bul jaıt alańdatyp otyr. Sol sebepti, gıgıenalyq jáne saqtyq sharalaryn, qoǵamdyq tártipti qatań saqtaýdy ótinemin!», - dedi Sáken Qalqamanov.
Eske salaıyq, qazirgi tańda elimizde koronavırýs juqtyrǵan 80 azamat tirkelip otyr. Dese de ázirge Túrkistan oblysynda indet juqtyrǵandar tirkelgen joq. Soǵan qaramastan, oblys aýmaǵynda indettiń aldyn alý sharalary kúsheıtilgen. Óńirdiń kireberisterine blok bekette qoıylǵan. Adam kóp shoǵyrlanatyn iri saýda oryndary men oıyn-saýyq ortalyqtary jáne bazarlar ýaqytsha jabylyp, jumys isteýine shektelgen.
