Túrkistan oblysyna ókpeni jasandy jeldetý apparattary jetkizildi
TÚRKІSTAN. QazAqparat – Túrkistan oblysynyń aýrýhanalary Germanııada shyǵarylǵan ókpeni jasandy jeldetý apparattarymen tolyqty. «Jenny» markaly 26 apparat aýdandyq, qalalyq aýrýhanalarǵa jetkiziledi, dep habarlaıdy QazAqparat tilshisi.
Jańa medıtsınalyq apparattardy oblys ákimdiginde arnaıy mamandar tanystyrdy. Ómirzaq Shókeev COVID-19 ınfektsııasynyń taralýyna qatysty jaǵdaıdyń qatań baqylaýda ekenin atap ótti. Sońǵy úlgide jabdyqtalǵan ókpeni jasandy jeldetý apparattary bir mezette qan qysymyn kórsetip, júrek soǵysy men kardıogrammany ekranda birden kórsetip turady. Olardy óńirdegi aýrýhanalardyń birinshi basshylary men jansaqtaý bóliminiń dárigerleri, ınjener-mamandary tekserip, qabyldap alýda.
Oblystyq bıýdjet esebinen satyp alynǵan apparattar eń aldymen, Jetisaı, Ordabasy, Kentaý, Otyrar, Saryaǵash, Saıram, Qarabulaq, Túlkibas aýdandyq ortalyq aýrýhanalary men Túrkistan qalalyq ortalyq jáne balalar aýrýhanasyna jetkizilgen. Atalǵan qondyrǵylarǵa oblystyq qoǵamdyq densaýlyq basqarmasy ótken jyldyń jeltoqsan aıynda tapsyrys bergen. Sol ýaqtta belgilengen baǵamen árqaısysy 16 mıllıon teńgege satyp alynǵan bolatyn.
«Bul apparattardy alyp kelýge jetkizýshi kompanııa qoldaý kórsetti. Jańa qondyrǵylar burynǵy, ıaǵnı, qymbattamaı turǵandaǵy baǵamen satyp alyndy. Onyń ústine nemis apparattary balalarǵa da, eresekterge de arnalǵan», - dedi oblys ákiminiń orynbasary Joldymurat Amanbaev.
Oblys aýmaǵynda ókpeni jasandy jeldetý apparatyna táýeldi aýyr haldegi naýqastar joq. Aldaǵy ýaqytta oǵan muqtajdar bolǵan jaǵdaıda qondyrǵylardyń sany jetkilikti. Jetkizýshi kompanııa ókilderiniń qural-jabdyqtardy Almaty qalasynan Túrkistan oblysyna eshbir kedergisiz tasymaldaýy baqylaýǵa alynǵan bolatyn.
