Túrkistan oblysyna QR Premer-Mınıstriniń birinshi orynbasary keldi
TÚRKІSTAN. QazAqparat - Búgin Túrkistan qalasyna QR Premer-Mınıstriniń birinshi orynbasary Asqar Mamın bastaǵan jumysshy top keldi. Aımaq basshysy Janseıit Túımebaev delegatsııaǵa oblys ortalyǵyndaǵy birqatar nysandardy tanystyrdy, dep habarlaıdy QazAqparat tilshisi.
Delegatsııa aldymen Túrkistandaǵy Otyrar shaǵyn aýdanynda bolyp, ákimshilik-iskerlik ortalyqta boı kóterip jatqan nysandardy aralap kórdi. Onda qazirgi tańda 26 kópqabatty turǵyn úıdiń qurylys jumystary júrgizilýde. 1 536 páterdiń 1200-i (20 turǵyn úı) arendalyq úıler bolsa, qalǵan 6 turǵyn úı, ıaǵnı 336 páter kredıttik baspanalar qatarynda. Bıyl qyrkúıek aıynda irgetasy qalanyp, bıýdjet esebinen salynyp jatqan 20 turǵyn úıdiń 11-i keler jyldyń sáýir aıynda tapsyrylady dep josparlanǵan. Al, 9 turǵyn úı keler jyldyń qarasha aıyna paıdalanýǵa beriledi. Kredıttik kópqabatty 6 turǵyn úıdiń qurylys jumystary maýsym aıynda aıaqtalady.
QR Premer-Mınıstriniń birinshi orynbasary bastaǵan jumysshy topqa Túrkistan qalasynyń ákimi Álipbek Óserbaev oblys ortalyǵyn ınfraqurylymmen qamtý josparymen tanystyrdy. Túrkistan qalasynyń ınjenerlik ınfraqurylymy qazirgi tańda salynyp jatqan ákimshilik-iskerlik ortalyǵynyń 270 gektar jáne rýhanı-mádenı ortalyǵynyń 98 gektar aýmaǵyn qamtamasyz etýge múmkindik beredi. Aǵymdaǵy jyly Túrkistan qalasynda 20 myń abonent gazben qamtamasyz etilip, qamtý deńgeıi 58 paıyzǵa jetetin bolady. 
