Túrkistan oblysyna kelýshi týrıster sany 5,6 esege ósti
TÚRKІSTAN. QazAqparat - Jyl basynan beri Túrkistan qalasyna 1,1 mıllıonnan astam týrıst kelgen. Qonaqtardyń legi ótken jyldyń sáıkes kezeńimen salystyrǵanda 5,6 ese ósken, dep habarlaıdy QazAqparat tilshisi.
Qazir memlekettiń qoldaýy men jergilikti ákimdiktiń júıeli jumysynyń arqasynda óńirdiń týrıstik áleýeti artyp keledi. Týrısterge tıimdi qyzmet kórsetý úshin qalanyń tarıhı ortalyǵynda «Sapar ortalyǵy» (týrıstik ortalyq) ashylǵan. Týrızmge aqparattyq qyzmet kórsetý men ózge de qyzmet sapasyn arttyrý, aqparattyq qoljetimdiligin arttyrý men osy baǵytta mamandar daıarlaý der kezinde júzege asyrylýda.
Ortalyq oblys turǵyndary men qonaqtaryna «bir tereze» qaǵıdaty boıynsha birneshe baǵytta (tarıhı-mádenı, saýyqtyrý jáne saýyqtyrý, tabıǵı) qyzmet kórsetip otyr. Budan ózge oblys ortalyǵynda birneshe zamanaýı qonaqúıler ashylyp, jumysyn bastady. «Kerýen Saraı» kesheni týrısterdiń súıikti ornyna aınaldy.
Sonymen qatar Túrkistan qalasynyń týrıstik oryndary álemdegi eń iri Tripadviser.com týrıstik platformasyna enip, 50 ekskýrsovod maman daıyndaldy. Óńirdegi týrıstik áleýetti arttyrý maqsatynda Túrkııa, Ózbekstan, Qyrǵyzstan, Ázirbaıjan, Bashqurtstan elderiniń BAQ ókilderine jáne 131 otandyq jáne sheteldik týroperatorlarǵa 4 aqparattyq týr uıymdastyryldy.
«Áziret Sultan» qoryq-mýzeıiniń aýmaǵy abattandyrylyp, kelýshiler úshin tartymdy bola tústi. «Tuńǵysh Prezıdent» saıabaǵy qala turǵyndary men qonaqtarynyń súıikti oryndarynyń birine aınaldy. Týrızm salasynda halyqaralyq deńgeıdegi joǵary bilikti mamandardy daıyndaý jáne qyzmet kórsetý sapasyn arttyrý úshin oblys ortalyǵynda Halyqaralyq týrızm jáne qonaqjaılylyq ýnıversıteti ashyldy.
Qala aýmaǵynda týrıstik-saýyqtyrý kesheni men eskek esý bazasy men jasandy kól boı kóterýde. Atalǵan nysandar kelesi jyly paıdalanýǵa beriledi dep josparlanyp otyr. Tólebı aýdanynda shańǵy týrızmin damytý maqsatynda «Qasqasý» týrıstik-saýyqtyrý ortalyǵy salynbaq. Búgingi kúni munda ınjenerlik ınfraqurylymnyń qurylysy júrgizilýde. Bul jobalardyń sátti júzege asýy óńirdiń týrıstik múmkindikterin keńeıtip, qosymsha jumys oryndaryn ashýǵa múmkindik paıda bolady.
Sonymen qatar oblys aýmaǵynda 1600-den astam tarıh jáne mádenıet eskertkishteri bar. Sala mamandarynyń málimetinshe, oblystyń týrızm salasy úsh baǵytta damıtyn bolady. Atap aıtqanda, «tarıhı-tanymdyq» (Túrkistan, Kentaý qalalary jáne Báıdibek, Ordabasy, Otyrar aýdandary), «Saýyqtyrý» (Saryaǵash kýrorty aýmaǵynda) jáne «Ekologııalyq» (Qazyǵurt, Tólebı, Túlkibas aýdandary).
Osy sharalardyń nátıjesinde oblysqa keletin týrıster sany 2,5 mıllıonǵa deıin artady dep kútilýde. Joǵaryda atalǵan sharalardyń barlyǵy oblystyń tarıhı-mádenı murasyn respýblıkada jáne shetelde saqtaýǵa, damytýǵa jáne tanymal etýge, týrısterdiń turýy úshin qolaıly jaǵdaı jasaýǵa baǵyttalǵan. Bul Túrkistan qalasynyń týrıstik tartymdylyǵyn arttyrýǵa múmkindik bermek.
