Túrkistan oblysyna Іshki ister mınıstrliginiń qosymsha kúshteri jetti
TÚRKІSTAN. QazAqparat - QR Іshki ister mınıstrligi óńirlerdegi vedomstvolyq mekemelerinen Túrkistan oblysynyń Maqtaaral aýdanyna qosymsha kúsh tartyp, tótenshe jaǵdaı saldaryn joıýǵa jumyldyrýda. Bul týraly QazAqparat QR ІІM Tótenshe jaǵdaılar komıtetine silteme jasap habarlaıdy.
5 mamyr kúni Shymkent qalasy, Jambyl jáne Qyzylorda oblystarynyń Tótenshe jaǵdaılar departamentterinen barlyǵy 116 adam, 58 tehnıka, júzý quraldary jáne motopompalar tótenshe jaǵdaı saldaryn joıý úshin Túrkistan oblysyna keldi.
6 mamyr kúnitańerteń Shymkent qalasy men Túrkistan oblystyq TJD-nyń jeke quramymen birge, 6 tirkemeli motopompa qosymsha jiberildi.
Budan bólek, Almaty qalasynan Ulttyq ulan áskerı bóliminiń kúshteri men quraldary (160 adam, 15 birlik tehnıka) túnde Shymkent qalasyna jetip, qazir oqıǵa ornyna bara jatyr.
Osylaısha,QR ІІM-niń tótenshe jaǵdaı oryndaryna jumyldyrylǵan kúshteri men quraldarynyń jalpy sany: 335 adam, 112 tehnıka, júzý quraldary men motopompany qurady.
«5 mamyrda keshke Shymkent qalasynan, Qyzylorda jáne Jambyl oblystarynan kelip jetken TJK kúshteri men quraldary qutqarýshylardy ornalastyrý úshin lager ornatty. Ótken táýlikte kelip jetken Jambyl, Qyzylorda oblystary men Shymkent qalasy TJD kúshteri 2 mln. jýyq tekshe metr sýdy soryp shyǵardy. Qoǵaly, Nurly jol, Ferdoýsı, Yrysty, Qaraqyr, Órgebas eldi mekenderinde uzyndyǵy 15 shaqyrym bógetti nyǵaıtyp, 85600 qum salynǵan qap tósedi. Qosymsha tartylǵan ınjenerlik tehnıka Myrzakent kentinde shatyrly qalashyqta ornalasqan. Árbir 2 saǵat saıyn sý deńgeıine monıtorıng júrgiziledi, ol jedel shtabtyń turaqty baqylaýynda. Sý basqan ýchaskeler men qaýipti eldi mekender aımaqtarynyń ahýaldyq kartasy ázirlendi», - dedi Tótenshe jaǵdaı komıtetinen.
Jedel shtab Myrzakent eldi mekeninde aýdandyq ákimdik ǵımaratynda ornalasqan. Shtabta QR ІІM TJK jáne Ulttyq ulannyń, QR Ulttyq qaýipsizdik komıteti Shekara qyzmeti, Túrkistan oblysynyń TJD, Túrkistan oblysynyń Polıtsııa departamentiniń ókilderi jumys isteýde.
Sondaı-aq málim etilgendeı, apattyq-qutqarý jáne kezek kúttirmeıtin jumystardy júrgizý úshin QR Іshki ister, Qorǵanys mınıstrlikteriniń jáne jergilikti atqarýshy organdardan barlyǵy 986 adam, 180 tehnıka men 4 júzý quraly jumyldyryldy. Joıý jumystaryna qutqarýshylar, polıtsııa qyzmetkerleri, áskerı qyzmetshiler, jergilikti atqarýshy organdardyń qyzmetkerleri, eriktiler qatysýda.
