Túrkistan oblysyna Indonezııadan keletin týrıster sany artyp otyr
TÚRKІSTAN. QazAqparat - Túrkistan oblysynyń kıeli jerlerine zııarat jasaǵysy keletin ındonezııalyq musylmandar sany artýda. Bul másele Djakarta qalasynda Túrkistan oblysy delegattary men Indonezııa eliniń týroperatorlary arasynda ótken kezdesý barysynda sóz boldy, dep habarlaıdy QazAqparat tilshisi.
Ekijaqty kezdesý Túrkistan oblysy delegatsııasynyń Malaızııa jáne Indonezııa memleketterine jasaǵan roýd-shoýy aıasynda ótti. Delegattar qatarynda Túrkistan oblysynyń týrızm jáne syrtqy baılanystar basqarmasy, «Túrkistan» ÁKK» AQ fılıaly - «Turkistan Invest» kompanııasy, Túrkistan oblysynyń týrızm ındýstrııasyn damytý assotsıatsııasy, «Turkistan Tourism Center» aqparattyq ortalyǵy, «Aray Deluxe Thermal Resort» shıpajaıy jáne «Sky Way», «Týrkestan Elıt týr», «Ekspedıtsııa ıÝg» týrıstik operatorlary boldy. Al, is-sapar Túrkistan oblysynyń týrızm jáne syrtqy baılanystar basqarmasynyń uıymdastyrýymen ótti.
«Túrkistan» ÁKK» AQ fılıaly «Turkistan Invest» kompanııasy baspasóz qyzmetiniń málimetinshe, ındonezııalyq saıahatshylar Túrkistan óńirinde ornalasqan Arystan Bab jáne Qoja Ahmet ıAssaýı keseneleri, ańyz boıynsha Muhammed Paıǵambardyń sahabasy bolǵan Úkásh atanyń qudyǵy úlken qyzyǵýshylyq tanytyp otyr. Sondaı-aq, qupııasy men syry mol alyp «Aqmeshit» úńgiri de týrıster sanynyń artýyna septigin tıgizýde. Jyl saıyn Saýd Arabııasyna ýmra jáne qajylyq jasaýǵa Indonezııadan mıllıondaǵan musylmandar aǵylyp keledi. Kóbine, ýmra ǵıbadatyn oryndaǵannan keıin zııaratshylardyń basym bóligi Ortalyq Azııanyń kıeli jerlerine sapar shegedi.
«Ortalyq Azııa elderine jasalatyn týrmarshrýttarǵa Ózbekstandaǵy ejelgi Buqara, Samarqand qalalary, Iordanııadaǵy jartasta soǵylǵan Petra qalasy jáne taǵy basqa elder kiredi. Endigi kezekte baratyn jerdiń geografııasy keńeıedi. Oǵan Túrkistan oblysynyń kıeli nysandary enedi dep josparlanýda»,- deıdi «Turkistan Invest» kompanııasynyń syrtqy baılanystar jónindegi basqarýshy dırektory Baıan Kaıýpova.
Kelissóz barysynda ındonezııalyq bılik basyndaǵylar Almaty men Djakarta qalalary arasynda tikeleı áýe baılanysyn jasaýdy usyndy. Búgingi tańda Almatydan Djakartaǵa Malaızııa astanasy Kýala-Lýmpýr arqyly ǵana ushyp barýǵa bolady.
«Djakarta-Almaty tikeleı áýe reısin ashý óńirlerińizge baratyn týrısterdiń, onyń ishinde zııaratshylardyń sanyn arttyrýǵa úlken serpilis beredi. Búginde Indonezııada 270 mln jýyq turǵyn ómir súredi, onyń 90 paıyzyn musylmandar quraıdy. Meniń oıymsha, bizdiń zııaratshylardyń kóbisi Túrkistanǵa barý múmkindigin jiberip almaıdy», - deıdi Indonezııa prezıdentiniń arnaıy ókili Adatııa Perdona .
