Túrkistan oblysyna 703 mlrd teńge ınvestıtsııa tartyldy

TÚRKІSTAN. QazAqparat - Túrkistan oblysynda ótken jyly 703,3 mlrd teńgege ınvestıtsııa tartyldy. Oblys ákimi Ómirzaq Shókeevtyń aıtýynsha, óńirde ekonomıkanyń basty kórsetkishi bolyp tabylatyn jalpy ónerkásip ónimniń kólemi ótken jyly 535,2 mlrd teńge bolǵan, dep habarlaıdy QazAqparat tilshisi.

Óńir basshysy sondaı-aq, ótken jyly oblysta 258 mlrd teńgeniń ónimi óndirilgenin jetkizdi.

Bul 2019 jylmen salystyrǵanda naqty kólem ındeksi 3,5%-ǵa artqanyn kórsetedi. Al, bıyl bul kórsetkishterdi aıtarlyqtaı arttyrý kózdelgen.

Máselen, aımaqta jumys istep turǵan shaǵyn jáne orta kásipkerlik sýbektileriniń sany 141 myńǵa jetken.

Sońǵy 2,5 jylda olardyń sany 14 myńǵa ósken. Osy salada 218 myń adam jumyspen qamtylǵan.

Bul sektorda 555 mlrd teńgeniń ónimi óndirilip, ótken kezeńmen salystyrǵanda 15,6%-ǵa ulǵaıǵan.

Basty kórsetkish shaǵyn jáne orta bıznestiń ekonomıkadaǵy úlesi 21% qurap (2020 jyldyń 9 aıy) strategııalyq kartada mindettelgen ındıkator kórsetkishi tolyǵymen oryndaldy.

«Qarapaıym zattar ekonomıkasy» baǵdarlamasy sheńberinde jalpy somasy 29 mlrd teńgeni quraıtyn 287 joba qarjy ınstıtýttarymen qarjylandyryldy.

Bul - elimizdegi eń úlken kórsetkish.

«Bul baǵdarlamany júzege asyrýda óńirler arasynda kósh bastap turmyz. Kásipkerlerdiń óndiristik qýatyn qoldaýǵa baǵyttalǵan «Bıznestiń jol kartasy 2025» memlekettik baǵdarlamasynyń bıýdjeti 23%-ǵa ulǵaıyp, 2,9 mlrd. teńgege jetti. Nátıjesinde 400-ge jýyq kásiporyna qoldaý kórsetilip, qarjylandyryldy. Bıznes-ahýaldy jaqsartý men qoldaý maqsatynda oblysymyzda «Bızneske arnalǵan Úkimet» biryńǵaı servısi iske qosylyp, jumys jasaýda. Kásipkerlerge 33 myńnan astam qyzmet túrlerin kórsetip, 1 myńnan astam bıznes josparlardyń 78%-y qarjylandyrý deńgeıine deıin súıemeldendi. Nátıjesinde, oblysymyz 2020 jyldyń qorytyndysymen «Bıznesti júrgizý jeńildigi» reıtıngi boıynsha Respýblıkada 1 oryndy ıelenip, bıznesti júrgizý boıynsha úzdik óńir bolyp atandy»,-dedi Ómirzaq Shókeev.

Bıyl «Bıznestiń jol kartasy 2025» jáne «Qarapaıym zattar ekonomıkasy» baǵdarlamalary arqyly kásipkerlik sýbektilerin 70 mlrd teńgege jýyq jeńildetilgen 6% nesıemen qamtamasyz etý josparlanǵan.

«Bızneske arnalǵan Úkimet» biryńǵaı servısi arqyly 40 myńnan astam qyzmetter kórsetip, shaǵyn jáne orta kásipkerlik sýbektileriniń sanyn 150 myńǵa deıin jetkizilip, óndiriletin ónim kólemin 900 mlrd teńgege deıin ulǵaıtý kózdelgen.

«Ortalyq Azııa» halyqaralyq saýda-ekonomıkalyq yntymaqtastyǵy ortalyǵyn qurý maqsatynda Saryaǵash aýdanynda 200 gektar aýmaqqa saýda ortalyǵynyń qurylylys salý jobasy ázirlenedi dep josparlanyp otyr.

Mańyzdy jobalardy iske asyrý boıynsha atqarylǵan jumystardyń nátıjesinde, oblysqa 703,3 mlrd teńge ınvestıtsııa baǵyttalyp, naqty kólem ındeksi 59,4% artqan.