Túrkistan oblysyna 442 mlrd teńge kóleminde ınvestıtsııa tartylǵan
Oblystyq ákimdiktiń málimetinshe, óńirdegi ınvestıtsııalardyń ósý qarqyny boıynsha Respýblıka deńgeıinde 14-orynnan 2-orynǵa kóterilgen. Al, aǵymdaǵy jyly óńdeýshi ónerkásipke tartylǵan ınvestıtsııalar kólemi 20,8 mlrd teńgeni quraǵan. Aımaqta alǵash ret 2019-2024 jyldarǵa arnalǵan Túrkistan oblysynyń ınvestıtsııalyq jobalarynyń tizbesi qalyptastyrylǵan. Oǵan jalpy somasy 3,4 trln teńgege 374 joba engizilgen. Sonyń ishinde 50 joba sátti júzege asyrylyp, aǵymdaǵy jyly 410 mlrd teńgege jýyq 100-den asa ınvestıtsııalyq jobany júzege asyrý josparlanyp otyr. Sonymen qatar óńirde 11 aı ishinde eksport kólemi 632,1 mln AQSh dollaryn quraǵan. Onyń ishinde shıkizattyq emes eksporty 304 mln AQSh dollaryn nemese eksporttyń jalpy kóleminiń 48 paıyzyna teń bolyp otyr.
Aıta keteıik, jalpy óńirdiń ınvestıtsııalyq tartymdylyǵyn jaqsartý maqsatynda týrızmniń damýyna yqpal etetin «TURKISTAN» arnaıy ekonomıkalyq aımaǵy men ótken jyly «TURKISTAN» ındýstrıaldyq aımaǵy qurylǵan. Odan bólek, «Túrkistan» ındýstrıaldy aımaǵynyń aýmaǵynda ınvestorlar jáne jumysshylarǵa arnalǵan zamanaýı standarttarǵa saı eko qalashyq salynatyn bolady. Indýstrıaldyq aımaqtarda 41,5 mlrd teńgeni quraıtyn 58 joba ornalasqan bolsa, onyń 25,1 mlrd teńgeni quraıtyn 30 jobasy iske asyrylǵan. Aǵymdaǵy jyldyń qorytyndysy boıynsha 734 mln teńge kóleminde memlekettik bıýdjetke salyq túsip, 2020 jyly 3 mlrd teńgeni quraıtyn 7 jobany iske asyrý josparlanyp otyr.
