Túrkistan oblysyna 130 myń dana «SPÝTNIK V» vaktsınasy jetkiziledi
TÚRKІSTAN. QazAqparat - Túrkistan oblysynda koronavırýs indetiniń taraýy aldyńǵy aptamen salystyrǵanda 26% tómendese, vırýsty pnevmonııa 29 jaǵdaıǵa óskeni baıqalady.
Negizinen jyl basynan beri mobıldi top karantın rejımin saqtamaǵan nysandar men jeke tulǵalarǵa 2520 hattama toltyryp, 145 062 620 teńge kóleminde aıyppul salynǵan. Bul týraly oblystyq sanıtarııalyq-epıdemıologııalyq baqylaý departamentiniń basshysy Nurbek Nyshanov Óńirlik kommýnıkatsııa ortalyǵynda ótken brıfıngte málimdedi.
«Óńirde jalpy 206 370 azamat ekpe qabyldaǵan. Osy kezeńge deıin «Spýtnık V» vaktsınasynyń 321 200 dozasy, «QazVac» - 4000, «Hayat-Vax» vaktsınasynyń 86000 dozasy jetkizilgen. 9-maýsymǵa deıin «Spýtnık V» vaktsınasynyń taǵy 1-komponentiniń 130 myń dozasy jetkiziledi», - dedi Nurbek Sadyqbekuly.
Oblystyq qoǵamdyq densaýlyq basqarmasy basshysynyń orynbasary Altyn Dosanovanyń aıtýynsha, aımaqtaǵy 128 egý pýnktterinde koronavırýs ınfektsııasyna qarsy vaktsınatsııa júrgizilýde. Sonymen qatar, 80 kóshpeli egý brıgadalary jumys isteýde. Medıtsına uıymdaryndaǵy dárilik zattar qory men arnaıy qorǵanysh quraldary 2 aıǵa jetkilikti.
Sondaı-aq, Túrkistan oblysynda «Ashyq» jobasy boıynsha jumys isteıtin 248 kásipkerlik nysan bar bolsa, 123 nysan QR kodyn alyp jobaǵa qosylǵan. Onyń ishinde, Túrkistan qalasynda baǵdarlama 54 nysanda paıdalanylady. Búginde óńirlik palataǵa jobaǵa qatysýǵa tórt júzden astam kásipkerden ótinim túsken.
