Túrkistan oblysyn damytýǵa 5 jylda 3,6 trln teńge jumsalady
NUR-SULTAN. QazAqparat – Ulttyq ekonomıka mınıstri Áset Erǵalıev Úkimet otyrysynda Túrkistan oblysynyń áleýmettik-ekonomıkalyq damýynyń 2021-2025 jyldarǵa arnalǵan keshendi josparynyń jobasyn tanystyrdy, dep habarlaıdy QazAqparat tilshisi.
«Keshendi jospar ınvestıtsııalyq jobalardy iske asyrýdy, kólik jáne ınjenerlik-kommýnıkatsııalyq ınfraqurylymdy, áleýmettik salany, týrızmdi damytýdy, sondaı-aq qoǵamdyq quqyqtyq tártipti qamtamasyz etýdi kózdeıtin 142 is-sharadan turady. Jospardy iske asyrýǵa jalpy 3,6 trln teńge, onyń ishinde respýblıkalyq bıýdjetten – 530,6 mlrd teńge, jergilikti bıýdjetten – 348,5 mlrd teńge, jeke ınvestıtsııalardan – 2,7 trln teńge qajet», - dedi Áset Erǵalıev.
Mınıstrdiń aıtýynsha, bul qarajattyń bir bóligine 26 ónerkásiptik is-shara josparlanǵan. Onyń ishinde munaı óńdeý zaýytyn, hımııa keshenin jáne turmystyq tehnıkany óndirý zaýytyn salý, sondaı-aq «TURKISTAN» arnaıy ekonomıkalyq aımaq aýmaǵyn 973 gektarǵa ulǵaıtý jobalary bar.
