Túrkistan oblysy jylyjaı salýdan kósh basynda tur
ASTANA. QazAqparat - Túrkistan oblysy ónim kólemi boıynsha respýblıkada alǵashqylardyń qatarynda. Bul týraly búgin Túrkistan oblysynyń ákimi Janseıit Túımebaev Ortalyq kommýnıkatsııalar qyzmetiniń Túrkistan qalasynda ótkizgen kóshpeli baspasóz konferentsııasynda málimdedi.
«Aýyl sharýashylyǵy ónim kóleminiń ósimi 2017 jyldyń sáıkes kezeńimen salystyrǵanda 3,8% nemese 374 mlrd. teńgeni qurady. Onyń ishinde mal sharýashylyǵy 188 mlrd. teńgeni qurap, ótken jyldyń sáıkes kezeńinen 5 % artty. Ósimdik sharýashylyǵy 184,4 mlrd. teńge nemese 102,8% jetti. Et óndirisi 6,7%-ǵa artyp, 154,7 myń tonnany qurady. Shetelge 4600 tonna et eksporttalyp, bul kórsetkish boıynsha Túrkistan oblysy elimizde kósh bastady. Sút óndirisi 3,2%-ǵa artyp, 555,6 myń tonnaǵa, jumyrtqa 9,2%-ǵa artyp, 146,7 mln. danaǵa jetti. Respýblıka boıynsha aýyl sharýashylyǵy óniminiń úlesi 14,1% qurap, 2-orynǵa shyqty. Bıyl kókónis, kartop, baqsha daqyldarynan 2,7 mln. tonna ónim jınalyp, rekordtyq kórsetkishke qol jetkizildi. Onyń ishinde 500 myń tonnaǵa jýyq ónimder Reseı, Belarýs, Latvııa, Germanııa memleketterine eksporttalsa, 1 mln. tonnasy elimizdiń soltústik óńirlerine jóneltildi», - dedi J.Túımebaev.
Túrkistan oblysy jylyjaı, tamshylatyp sýǵarý boıynsha kósh bastap tur. Máselen, jylyjaı kólemi 1285,4 gektardy, al tamshylatyp sýǵarý ádisi 6,4 myń ga artyp, jalpy 64,4 myń gektardy qurady. Respýblıkada jylyjaıdyń - 80%, tamshylatyp sýǵarý aýmaǵynyń 72% túrkistandyqtarǵa tıesili.
