Túrkistan oblysy: jylqy qaqqan kóliktegi úsh adam mert boldy
TÚRKІSTAN. QazAqparat - Túrkistan oblysynda jolǵa shyǵyp ketken jylqy úsh adam ólimine ushyratqan apatqa sebep boldy, dep habarlaıdy QazAqparat óńirlik PD baspasóz qyzmetine silteme jasap.
Samara-Shymkent tas joly boıynda shymkenttik turǵyn óziniń «Toyota Camry 50» markaly kóligimen Túrkistannan Shymkent baǵytyna qaraı kele jatyp, joldyń sol jaq betinen shyqqan jylqyny qaǵyp ketken.
Osy jol-kólik oqıǵasy saldarynan 3 adam oqıǵa ornynda kóz jumdy.
Onyń ishinde ekeýi erli-zaıypty jáne bireýi jasóspirim, olardyń nemeresi.
Kóliktiń júrgizýshisi alǵan dene jaraqatynan Shymkent qalalyq aýrýhanasynyń jansaqtaý bólimine túsken. Ol qaza tapqan jandardyń kúıeý balasy.
Atalǵan jaıt Ordabasy APB-men QR QK -niń 345-babymen tirkeýge alynyp, sotqa deıingi tergeý amaldary júrgizilýde.
