Túrkistan oblysy jyl boıy «jasyl aımaqta» boldy – Ómirzaq Shókeev

NUR-SULTAN. QazAqparat – Túrkistan oblysynda mıllıonnan astam turǵyn COVID-19-ǵa qarsy ekpeni aldy. Bul týraly óńir ákimi Ómirzaq Shókeev aıtyp berdi, dep habarlaıdy QazAqparat tilshisi.

«Oblysymyz koronavırýstyń taralý qarqyny boıynsha jyl boıy «jasyl aımaqta» bolǵan eldegi jalǵyz oblys. Bul rette birlesken ujymdyq jumys pen dárigerlerdiń eńbegi orasan zor boldy dep Dúnıejúzilik densaýlyq saqtaý uıymynyń ókilderi atap ótti», - dedi Ó. Shókeev Ortalyq kommýnıkatsııalar qyzmetinde ótken baspasóz máslıhatynda.

Ákimniń aıtýynsha, óńirde epıdemıologııalyq jaǵdaı turaqty, juqpaly aýrýhanalarda dúrlikpe joq, tósek-oryndardyń kópshiligi bos.

«Vırýspen odan ári kúresý úshin óńirde birneshe joba júzege asyrylýda. Sonyń biri – jańa kópsalalyq aýrýhana salynýda. Sonymen qatar, jańa ınfektsııalyq aýrýhana paıdalanýǵa berildi. Aımaqta jappaı vaktsınalaý naýqany aıaqtalýǵa jaqyn. Búginde mıllıonnan astam turǵyn COVID-19-ǵa qarsy ekpeni aldy», - dedi Ó. Shókeev.