Túrkistan oblysy turǵyndarynan 50-den astam tirkelmegen qarý tárkilendi

TÚRKІSTAN. QazAqparat – Túrkistan oblysy Polıtsııa departamentiniń Ákimshilik polıtsııa basqarmasy men basqa da múddeli sala qyzmetkerleri birlesip, «Qarý» jedel-profılaktıkalyq is-sharasyn ótkizdi, dep habarlaıdy QazAqparat departamenttiń baspasóz qyzmetine silteme jasap.

Іs-shara qorytyndysy boıynsha 50-den astam tirkelmegen qarý alynyp, 400-den astam ákimshilik quqyq buzýshylyq anyqtaldy.

Naqtyraq aıtsaq, reıdtik jumystardyń 10 táýliginde polıtseıler zańsyz aınalymnan 37 ańshy myltyǵy, 6 gazdy tapansha, 7 sholaq jáne 1 oıyq myltyq tárkilep aldy. Sondaı-aq, is-shara barysynda tártip saqshylarynyń nazary azamattyq jáne qyzmettik qarýdy saqtaý men tirkeýge baılanysty erejelerdiń saqtalýyna aýdaryldy.

Nátıjesinde polıtsııa qyzmetkerleri 7 168 qarý ıesin tekserip, 405 quqyq buzýshylyqty anyqtady. Onyń ishinde QR ÁQBtK-niń 482-baby «Jeke jáne zańdy tulǵalardyń qarýdy zańsyz ıelenip alýy, berýi, ótkizýi, saqtaýy, alyp júrýi, tasymaldaýy» boıynsha 43, QR ÁQBtK-niń 484-baby «Azamattyq jáne qyzmettik qarý aınalymy qaǵıdalaryn buzý» boıynsha 299 jáne QR ÁQBtK-niń 486-baby «Azamattyq, qyzmettik, marapattyq, kollektsııalyq qarýdy tirkeý (qaıta tirkeý) ne ony esepke qoıý tártibin buzý» boıynsha 63 ákimshilik hattama toltyrdy.