Túrkistan oblysy trassalaryna úı janýarlarynyń mýlıajy qoıylyp jatyr

TÚRKІSTAN. Qazaqparat- Túrkistan oblysynda trassalarǵa úı janýarlarynyń mýlıajdary qoıylyp jatyr, dep habarlaıdy QazAqparat tilshisi.

Óńirdegi eń qaýipti sanalatyn oblystyq mańyzy bar joldardyń boıyna úı janýarlarynyń mýlıajdary ornatylyp jatyr.

Atap aıtqanda, Sholaqqorǵan – Shymkent baǵytyna 2 dana, Sholaqqorǵan-Túrkistan baǵytyna bireý jáne Sholaqqorǵan-Taýkent baǵytynda bir belgi qoıyldy.

Atalǵan joldarda iri qara mal kóp júredi. Al olardyń maketi alystan anyq kórinedi.

Al Sozaq aýdanynda jyldamdyqty báseńdetýge eskertý jasaıtyn belgiler aýdanda alǵash ret turǵyndardyń qaýipsizdigi úshin qoıylyp otyr.

«Belgiler jol-kólik oqıǵalarynyń aldyn alý, turǵyndardyń qaýipsizdigin saqtaý maqsatynda ornatyldy. Túıe, jylqy, sıyrdyń mýlıajyn arnaıy mal jaıylymy tusyna ornattyq. Sebebi bul aımaqtarda iri qara mal men kólik soqtyqqan jaǵdaılar jıi kezdesedi. Aldaǵy ýaqytta óz nátıjesin berip, oqys oqıǵalar azaıady dep senemiz», – deıdi Sozaq aýdandyq turǵyn úı-kommýnaldyq sharýashylyǵy jolaýshylar kóligi jáne avtomobıl joldary bóliminiń basshysy Dáýlet Qudaıbergenov.

Foto: Sozaq aýdany ákimdiginiń baspasóz qyzmeti