Túrkistan oblysy: Tólebı aýdanynda 120 otbasy baspanaly boldy
Aldymen Leńgir qalasyndaǵy І móltek aýdanynda «Nurly jer» baǵdarlamasymen qurylysy aıaqtalǵan 20 páterli 6 kópqabatty turǵyn úılerdiń páter kiltin turǵyndarǵa saltanatty túrde tapsyrdy. Atap aıtsaq, halyqtyń áleýmettik osal toptary sanatyndaǵy 60 otbasy, ata-anasynyń qamqorlyǵynsyz qalǵan 3 adam, kópbalaly otbasylar sanatyndaǵy 57 otbasyǵa páter berildi. Jalpy 120 otbasy turǵyn úımen qamtyldy.
— Tólebı — taý baýraıyndaǵy saf taza aýasy, tamyljyǵan tabıǵaty bar ólke. Búgingi úıler «Nurly jer» baǵdarlamasy boıynsha usynylyp otyr. Memleket basshysynyń tapsyrmasy boıynsha bıyl da qoljetimdi turǵyn úı qurylysynyń kólemi artady. Osynyń bári – halyqtyń ál-aýqatyn arttyrýǵa baǵyttalǵan memlekettik saıasattyń jemisi. Jańa qonys ıelerin shyn júrekten quttyqtaımyn. Shańyraqtaryńyz molshylyq pen berekege tolyp, elimiz aman, jurtymyz tynysh bolsyn! — dedi Ómirzaq Shókeev.
Tólebı aýdanynda barlyǵy 4520 azamat turǵyn úıge muqtaj retinde kezekke tirkelgen. Bul baǵytta jumys jalǵasady. 2021 jyly Túrkistan oblysynda 823,8 myń shashy metr turǵyn úı (6590 páter) paıdalanýǵa berilgen.
Jumys sapary barysynda Ómirzaq Shókeev «Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aıasynda memlekettik grant alǵan azamattardyń jumysymen tanysty. Tólebıde «Eńbek» memlekettik baǵdarlamasynyń ekinshi baǵyty aıasynda 38 turǵynǵa nesıe berilgen. 70 adam jańa bıznes ıdeıalaryn iske asyrýǵa arnalǵan memlekettik grantqa ıe bolǵan. Oblys ákimi aýdan ákimi men jaýapty basshylarǵa turǵyndardy jumyspen qamtý baǵytyndaǵy jumysty kúsheıtýdi tapsyrdy.
Óńir basshysy aýdan ardagerlerimen, etno-mádenı birlestik tóraǵalarymen jáne jastar ókilderimen, jergilikti turǵyndarmen kezdesti. Erkin pikir almasý formatynda ótken kezdesýde Prezıdent Qasym-Jomart Toqaevtyń tapsyrmalaryn oryndaý baǵyttary, memleketti damytýdaǵy jańa josparlary sóz boldy. Sonymen birge ótkir máseleler qozǵalyp, turǵyndardyń usynystary men ótinishteri tyńdaldy. Ómirzaq Shókeev árbir usynys hattamaǵa engizilip, tıisti jumys atqarylatynyn málimdedi.
