Túrkistan oblysy: Senatorlar shalǵaı aýdan turǵyndarymen jaıylym máselesin talqylady
TÚRKІSTAN. QazAqparat - Qazaqstan Respýblıkasy Parlamenti Senatynyń depýtattary Álı Bektaev pen Álimjan Qurtaev Túrkistan oblysyna jumys sapary aıasynda Saryaǵash aýdanynyń turǵyndarymen kezdesti, dep habarlaıdy QazAqparat.
Senatorlar Saryaǵash aýdanynyń shalǵaıdaǵy Darbaza aýyldyq okrýginiń turǵyndarymen kezdesýi barysynda jaıylym jerleriniń azdyǵy men alqaptardyń tozýy máselelerin talqyǵa saldy. Mundaı jaǵdaı turǵyndarǵa mal ósirýge qolbaılaý bolýmen qatar, jergilikti sút óńdeý óndirisiniń damýyn da tejeıdi. Kezdesý barysynda sharýa qojalyqtarynyń qaramaǵyndaǵy paıdalanylmaıtyn jaıylym jerlerin qaıtarý jumystaryn qolǵa alýdyń da mańyzdy ekeni atap ótildi.
«Jaıylym máselesin sheshýge qatysty Memleket basshysynyń tapsyrmasy bar. Máseleni sheshý úshin Parlament depýtattarynyń bastamasy boıynsha arnaıy zań jobasy ázirlenip jatyr. Osydan birneshe kún buryn Senatta onyń tusaýkeseri ótti. Zań jobasy qabyldanǵannan keıin jaıylym jerleriniń máselesi jaqsarýy tıis dep esepteımin» , - dedi Álı Bektaev.
Depýtattar Jibek joly aýylynda ornalasqan jylyjaı kesheniniń jumysymen de tanysty. Munda fermerler kóshet ósiredi. Jergilikti turǵyndarmen kezdesý barysynda elimiz Prezıdentiniń taıaýdaǵy Joldaýynda belgilegen reformalar, sondaı-aq Memleket basshysynyń halyqty taza aýyz sýmen qamtamasyz etý problemalaryn sheshý, kommýnaldyq qyzmetter baǵasynyń ósýi jónindegi bastamalarynyń mańyzy talqylandy. Agrarlyq sala mamandary jylyjaı óndirisiniń tolyqqandy damýyna kedergi keltirip otyrǵan mıneraldy tyńaıtqyshtardyń qymbattyǵyn da nazardan tys qaldyrmady. Osyǵan baılanysty, kóshet ósirýdi sýbsıdııalaý týraly usynys aıtyldy. Senatorlar bul máseleni elimizdiń aýyl sharýashylyǵy mınıstrligi basshylyǵynyń aldyna usyný týraly oılaryn ortaǵa saldy.
