Túrkistan oblysy Saryaǵash aýdanynyń turǵynnan 13,5 kg-nan astam esirtki tárkilendi

TÚRKІSTAN. QazAqparat - Túrkistan oblystyq Polıtsııa departamentiniń esirtki qylmysyna qarsy is-qımyl basqarmasynyń qyzmetkerleri Saryaǵash aýdandyq polıtsııa bóliminiń qyzmetkerlerimen birlesip, jedel-izdestirý is-sharalary barysynda esirtki saqtaǵan Saryaǵash aýdanynyń turǵynyn ustady.

Polisia.kz saıtynyń habarlaýynsha, jedel ýákilder kúdiktiniń úıin tintý kezinde aýladan ósimdik tektes esirtki zaty bar polıetılen paketterin tapty. Júrgizilgen saraptamaǵa sáıkes, aıǵaqty zat retinde alynǵan esirtki zaty jalpy salmaǵy 13,5 kg-nan asatyn «keptirilgen kóknár» bolyp shyqty.

Atalǵan jaıt QR QK-niń 296-babynyń 4-bóligi «Esirtki, psıhotroptyq zattardy, olardyń analogtaryn ótkizý maqsatynsyz zańsyz qoldaný» boıynsha Saryaǵash aýdandyq polıtsııa bóliminiń sotqa deıingi tergeýiniń biryńǵaı tizilimine tirkeldi.

«Qazirgi ýaqytta polıtsııa qyzmetkerleri er adamnyń asa iri mólsherde esirtkini qandaı maqsatpen saqtaǵanyn anyqtaýda. Kúdikti qamaýǵa alyndy. Tergeý amaldary júrgizilýde»,-delingen habarlamada.