Túrkistan oblysy ónimderiniń kerýeni Nur-Sultanǵa attandy

TÚRKІSTAN.QazAqparat - QR Konstıtýtsııa kúnine oraı, aǵymdaǵy jyldyń 31 tamyz jáne 1 qyrqúıek aralyǵynda Nur-Sultan qalasynda turaqty dástúrge aınalǵan Túrkistan oblysy aýyl sharýashylyǵy ónimderiniń jármeńkesi ótedi. Osyǵan baılanysty búgin túrkistandyq ónimderdiń kerýeni jolǵa shyqty, dep habarlaıdy QazAqparat oblys ákiminiń baspasóz qyzmetine silteme jasap

Jármeńkege 40-qa jýyq taýar óndirýshi 275 tonna aýyl sharýashylyǵy ónimderin halyqqa usynady. Atap aıtqanda, et jáne et ónimderinen – 52 tonna, kókónis – 86 tonna, kartop – 11 tonna, sút ónimderi – 23 tonna, baqsha daqyldary – 48 tonna, jemis-jıdek – 21 tonna, balyq – 5 tonna, ásel - 4 tonna jáne 25 tonna ózge de aýyl sharýashylyǵynyń ónimderi bar. Olardyń jalpy quny 123 mln 545 myń teńgeni quraıdy. Otandyq ónimder qala turǵyndary men qonaqtaryna bazar narqynan 10-15 paıyzǵa tómen baǵada satylymǵa túsetin bolady.

Sondaı aq, «Qazaqstanda jasalǵan» jobasy aıasynda Jetisaı aýdanynan «Ýlýgbek» JK aıaq kıim ónimderin, Tólebı aýdany «Lenger Tekstıl» JShS-i arnaıy jumys kıimderin, Saıram aýdany «Altyn adam» JShS erler kostıýmderi men mektep kıimderin qala turǵyndaryna qoljetimdi baǵada usynady.