Túrkistan oblysy men Shymkent qalasynyń jýrnalısteri arasynda spartakıada bastaldy

TÚRKІSTAN. QazAqparat – Túrkistan qalasyndaǵy Balýan Sholaq atyndaǵy sport kesheninde Baılanys jáne aqparat qyzmetkerleri kúnine oraı jýrnalıster arasynda dostyq pen əriptestikti tý etken dástúrli spartakıada bastaldy. Jyl saıyn uıymdastyrylatyn jarysqa bıyl Túrkistan oblysy men Shymkent qalasyndaǵy BAQ ókilderinen quralǵan 15 komanda qatysýda. Kásibı mereke qarsańynda jýrnalıster 9 sport túrinen baq synaýda, dep habarlaıdy QazAqparat tilshisi.

Spartıakadanyń ashylý saltanatynda Túrkistan oblystyq ishki saıasat basqarmasynyń basshysy Beısenbaı Tájibaev quttyqtaý sóz sóılep, atalǵan sharanyń mańyzdylyǵyna toqtaldy.

«Ózderińiz bilesizder, Túrkistan oblysynyń qurylǵanyna 1 jyl tolýyna oraı óńirde kóptegen is-sharalar ótip jatyr. Búgin de dúbirli saıys bastalyp ketti. Sizderdi spartakıadanyń ashylýymen oblys ákimi Ómirzaq Estaıulynyń atynan quttyqtaýǵa ruqsat etińizder. Oblystar men qalalar shekaramen bólingenimen jýrnalıster qaýymy shyǵarmashylyq turǵyda birlesip, eldi birlikke, izgilikke bastaýy tıis. Qoǵamdy damytýda sizderdiń de qosar úlesterińiz mol. Sondyqtan qos óńirdiń jýrnalısterin bóle-jarmaı, spartakıadany birge ótkizip otyrmyz», – dedi Beısenbaı Tájibaev.

Saıysta oblystyq Dene shynyqtyrý jáne sport basqarmasynyń basshysy Polat Qyryqbaev pen QR Qurmetti jýrnalısi Baıdýlla Qonysbek, ardager qalamger Nurmahan Nazarov ta jýrnalısterge jyly lebizderin bildirdi. QR Jýrnalıster odaǵy Túrkistan oblystyq fılıaly men Shymkent qalalyq fılıalynyń basshylary Ǵalymjan Elshibaı men Aıgúl Qapbarova da áriptesterdi kásibı merekemen quttyqtap, shyn myqtylar jeńsin degen tilekterin jetkizdi.

Túrkistan qalasynda ótken jarystyń alǵashqy kúni tilshiler qaýymy voleıbol, júzý, shahmat, arqan tartys túrleri boıynsha saıysqa túsip jatyr. Qalǵan 5 túri boıynsha Shymkent qalasynda uıymdastyrylady.

Uıymdastyrýshylardyń aıtýynsha, atalǵan shara tilshiler qaýymy arasynda salaýatty ómir saltyn nasıhattap, áriptester arasyndaǵy shyǵarmashylyq jáne dostyq qarym-qatynastardy nyǵaıtý jáne buqaralyq sportty damytý maqsatynda ótkizilýde.

Aıta keteıik, saıys Qazaqstan Jýrnalıster odaǵy Túrkistan oblystyq jáne Shymkent qalalyq fılıaldarynyń uıymdastyrýymen ótýde. Spartakıadaǵa Túrkistan oblystyq ishki saıasat basqarmasy, Shymkent qalalyq ishki saıasat jáne din isteri basqarmasy, Túrkistan oblystyq dene shynyqtyrý jáne sport basqarmasy, Shymkent qalasynyń dene shynyqtyrý jáne sport basqarmasy qoldaý kórsetýde.

Sonymen, Túrkistan tórinen bastaý alǵan spartakıada 16 maýsymda Shymkent qalasynda qorytyndylanbaq. Jeńimpaz komandalar men jýrnalıster arnaıy marapattar men aqshalaı syılyqtarǵa ıe bolady.

Eske salaıyq, 2018 jyly 19 maýsymda Elbasy, QR Tuńǵysh Prezıdenti Nursultan Nazarbaevtyń Jarlyǵymen Túrkistan oblysy qurylǵan bolatyn. Osyǵan oraı Túrkistan oblysynda mádenı, rýhanı, sporttyq is-sharalar uıymdastyrylyp jatyr.