Túrkistan oblysy men Shymkent qalasynyń túlekteri UBT-da ortasha 79,9 ball jınady
Basqarma basshysynyń sózinshe, test tapsyrǵandardyń bireýi - 139, úsheýi - 138 jáne beseýi - 137 ball jınaǵan. Sondaı-aq 1690 túlek "Altyn belgige" úmitker bolsa, olardyń 1650-i mektep qabyrǵasynda alǵan bilimderin aqtap shyqty. Ulttyq Biryńǵaı testileý kezinde 24 oqýshy "Altyn belgi" alǵanymen, nátıjeleri shektik balǵa jete almaı qalǵan. 16 bala 0 degen ball alǵan.
"Ókinishke qaraı, árbir sharanyń janynda sholaq belsendiler júredi. Olar oqýshylarǵa "kómektesemiz, sen úndemeı otyra ber. Daıyn jaýapty ákelip beremiz" dep úıretedi. Sondaı balalar eshteńe belgilemeı, aldanyp qalǵan jaǵdaılar kezdesken. Ókinishke qaraı, 22 myń balanyń ishinde 16 bala osylaısha 0 ball aldy. Olardyń ózderi, ata-analary men ustazdary kináli. Ol boıynsha jazalaý bolmaıdy. Sebebi, olar mektepten attestat alady, al jaýapkershiligi ózderiniń moınynda bolady. Biraq biz ár kemshilik boıynsha zerdeleý jumystaryn júrgizemiz", - deıdi Isataı Saǵyndyqov.
Basqarma basshysy, sondaı-aq, tártip buzyp, jaýaptary sanalmaı qalǵan oqýshylardyń da is-áreketine toqtaldy.
"Nege bir bala óz bilimimen 100 ball alady eken de, ekinshisi uıaly telefonmen kirip, 120 ball alýy kerek? Ádilettilik qaıda? Meniń kózimshe bir qyzdan bes birdeı uıaly telefon shyqty. Emtıhan erejesin buzǵany úshin 5 balanyń jaýaptary qabyldanbady. Olar uıaly telefonnan, qasyndaǵylardan kóshirýge, syrtta kitap alyp shyǵýǵa áser etti. Ótken jylǵa qaraǵanda túlekter men ata-analarynan komıssııaǵa túsken shaǵym joq", - dedi oblystyq bilim basqarmasynyń basshysy.
