Túrkistan oblysy men Shymkent qalasynda óndiristik jaraqattan 22 adam qaıtys bolǵan
TÚRKІSTAN. QazAqparat - Túrkistan oblysy men Shymkent qalasynda 1288 ret eńbek qaýipsizdigi erejelerin buzý deregi anyqtaldy. Bul týraly brıfıngte «Túrkistan oblysy jáne Shymkent qalasy kásipodaqtar ortalyǵy» aýmaqtyq kásipodaqtar birlestiginiń tóraǵasy Berik Bekjanov málimdedi, dep habarlaıdy QazAqparat tilshisi.
Berik Bekjanovtyń sózinshe, eki óńirdegi kásiporyndar men uıymdarda 101 óndiristik jazataıym oqıǵalary tirkelgen. Sonyń saldarynan 51 adam aýyr jaraqat alǵan, 22 jumysshy qaıtys bolǵan. Jyl basynan beri júrgizilgen tekserý barysynda keıir mekemelerde kásipodaqtyń bolmaýyna baılanysty zerdeleýge qatysý múmkindikteri bolmaı otyr.
«Anyqtalǵan zańbuzýshylyqtardyń 410-y eńbek qaýipsizdigi jaǵdaıyn qamtamasyz etýge qatysty bolsa, 261-inde eńbek qaýipsizdigi Erejesin jáne nusqaýlaryn buzǵan. 434-i arnaıy kıimmen jáne jeke qorǵanys kıimimen qamtamasyz etpegen, sondaı-aq, 183 eńbek qaýipsizdigi boıynsha basqa da zańbuzýshylyqtar bolǵan. Anyqtalǵan kemshilikter túzetildi. Qalǵan eskertpeler boıynsha tıisti jumystar atqarylýda»,- deıdi Berik Bekjanov.
Osyǵan oraı, kásipodaq qurylmaǵan mekemelerde bastaýysh kásipodaq uıymdaryn ashý jáne olarǵa músheler tartý jumystary júrgizildi. Osy baǵytta jańadan 41 bastaýysh kásipodaq uıymy ashylyp, oǵan 3079 múshe tartyldy.
Túrkistan oblysy men Shymkent qalasynyń ákimdigi áleýmettik áriptestik pen áleýmettik jáne eńbek qatynastaryn retteý jónindegi úsh jaqty óńirlik komıssııalar quryldy.
Atalǵan komıssııanyń atqarǵan jumystarynyń nátıjesinde 4 mekeme 2,9 mln.teńge qaryzdaryn japqan. 378 jumysshyǵa 45 mln teńge qaryz bolǵan eki mekeme bankrot dep tanylǵan. Ózge de mekemelerde jalaqy qaryzdary óndirilgen.
