Túrkistan oblysy men Shymkent qalasynda 6 myńǵa jýyq daý medıatsııa jolymen sheshilgen

TÚRKІSTAN. QazAqparat - Túrkistan oblysy men Shymkent qalasynda 6 myńǵa tarta daý medıatsııa jolymen sheshilgen. Bul týraly «Tájirıbeli zańgerlerdiń ulttyq ortalyǵy» respýblıkalyq qoǵamdyq birlestigi ókilderi kásipodaq basshylarymen ótken úılestirý keńesinde málimdedi, dep habarlaıdy QazAqparat tilshisi.

«Shymkent qalasy kásipodaqtar ortalyǵy» aýmaqtyq kásipodaqtar birlestiginiń tóraǵasy Berik Bekjanovtyń qatysýymen ótken salalyq otyrysta eńbek daýlaryna qatysty birqatar problemalar kóterildi. Sonyń ishinde jumys berýshi men jumysshynyń arasyndaǵy daýlardy tatýlasý jolymen sheshý máselesi aıtyldy. Máselen, «Tájirıbeli zańgerlerdiń ulttyq ortalyǵy» mamandarynyń sózinshe, aryz-shaǵymdardyń basym kópshiligi ajyrasý men alıment tóleýge, eńbek daýlary men tonaýǵa qatysty bolǵan.

«Azamattar túrli másele boıynsha júginedi. Jalaqyny ýaqtyly tólemeý, kelisimshartty buzý sııaqty problemalar jıi týyndaıdy. Mundaı jaǵdaıda taraptar ózderiniki ǵana durys dep sanaıdy. Keıde jumystan bosatylǵan qyzmetkerler mundaı sheshimdermen kelispeıdi», - deıdi «Tájirıbeli zańgerlerdiń ulttyq ortalyǵy» ókildiginiń basshysy Laýra Aqshegırova.

Tek ótken jyldyń ózinde medıatorlar 20 eńbek daýyn sheshken. Óndiriste oryn alǵan daýlardy azaıtý úshin «Shymkent qalasy kásipodaqtar ortalyǵy» aýmaqtyq kásipodaqtar birlestiginiń tóraǵasy Berik Bekjanov pen «Tájirıbeli zańgerlerdiń ulttyq ortalyǵy» ókildiginiń basshysy Laýra Aqshegırova ózara yntymaqtastyq týraly memorandýmǵa qol qoıdy. Memorandýmnyń basty maqsaty - Qazaqstan Respýblıkasy Prezıdentiniń «Qazaqstan-2050» Strategııasy, «Bolashaqqa baǵdar: rýhanı jańǵyrý», «Eńbek qoǵamyna qaraı 20 qadam», «Ult jospary - 100 naqty qadam» tapsyrmalaryn júzege asyrýmen daýlardy retteýde, sonyń ishinde medıatsııany damytý jáne daýdy (janjaldardy) sheshýdiń basqa da balamaly ádisterin damytýdy retteý.

«Medıatorlarǵa júginý ýaqytty, qarjylyq shyǵyndardy únemdeýge múmkindik beredi. Psıhologııalyq aspekt te mańyzdy. Búgin Medıatsııany damytý -sot aýyrtpalyǵyn boldyrmaý jáne halyqtyń quqyqtyq saýattylyǵyn arttyrý ǵana emes, sonymen qatar «Ult jospary - 100 naqty qadam» baǵdarlamasyn júzege asyrý tásilderiniń biri», - dep atap ótti Túrkistan oblysy men Shymkent qalasy Kásipodaq ortalyǵynyń tóraǵasy Berik Bekjanov.

Aıta keteıik, búginde Shymkentte jáne Túrkistan oblysynda 60 medıator jumys isteıdi.