Túrkistan oblysy men Ózbekstan arasyndaǵy taýar aınalymy 447 mln AQSh dollaryn qurady
TÚRKІSTAN. QazAqparat - Túrkistan oblysy men Ózbekstan arasyndaǵy taýar aınalymy aǵymdaǵy jyldyń 11 aıynda 447 mln AQSh dollaryn qurady. Bul kórsetkish ótken jylmen salystyrǵanda 27,7 paıyzǵa ósti.
Bul týraly Túrkistan oblysynyń óńirlik kommýnıkatsııalar qyzmetinde oblystyq Memlekettik kirister departamenti basshysynyń orynbasary Eldos Saýdabaev málimdedi, dep habarlaıdy QazAqparat tilshisi.
Aıta keteıik, oblystyq Memlekettik kirister departamenti quramynda alty shekaralyq, eki ishki keden beketi qyzmet atqarady. Bul beketterde 14 myńnan asa taýarǵa arnalǵan deklaratsııa resimdelgen.
«Departamenttiń keden beketteri arqyly 174 865 júk avtokólik quraldary ótip, ótken jylmen salystyrǵanda ol 63,7 paıyzǵa ósken. Sondaı-aq, 244 310 jeńil avtokólik shekaradan ótken. Budan ózge, 17 019 264 azamat shekaradan ótip, byltyrǵyǵa qaraǵanda 46,8 paıyzǵa kóbeıgen. Keden beketterinde kezekte turǵan avtokólik quraldarynyń ótýin jyldamdatý maqsatynda keden beketine qosymsha qyzmetkerler men jumys oryndary kóbeıtildi. Sondaı-aq, avtokólik quraldarynyń ótkizý qabiletin arttyrý maqsatynda, 2019 jyldyń aqpan aıynan bastap «B.Qonysbaev» ótkizý pýnktiniń qaıta qurý qurylysynyń bastalýy josparlanýda. Bul jobada avtokólikterdiń kirip-shyǵý jolaqtaryn 6 jolaqqa deıin ulǵaıtý qarastyrylǵan», - dedi Eldos Saýdabaev.
Memlekettik kirister departamenti basshysynyń orynbasary sondaı-aq Eýrazııalyq ekonomıkalyq odaqtyń keden shekarasy arqyly ótkizilgen taýarlar men tulǵalarǵa qatysty 514 ákimshilik is qozǵalǵanyn atap ótti.
Onyń sózinshe, 33 fakti boıynsha qylmystyq is qozǵalǵan. 31 faktisi esirtki zattary tasymaldaýǵa qatysty bolǵan. Bir fakti medıtsınalyq preparattar boıynsha jáne taǵy biri ekonomıkalyq kontrabandaǵa qatysty qylmystyq is ekeni anyqtaldy.
