Túrkistan oblysy men Ózbekstan arasyndaǵy taýar aınalymy 447 mln. AQSh dollaryn qurady
ASTANA. QazAqparat - Túrkistan oblysy men Ózbekstan Respýblıkasy arasynda taýar aınalymy aǵymdaǵy jyldyń 11 aıynda 447 mln. AQSh dollaryn qurap, ótken jylmen salystyrǵanda 27,7 paıyzǵa ósti. Bul týraly Túrkistan oblysynyń óńirlik kommýnıkatsııalar qyzmetinde oblystyq Memlekettik kirister departamenti basshysynyń orynbasary Eldos Saýdabaev málimdedi.
2018 jyldyń 11 aılyq qorytyndysy boıynsha departamenttiń keden beketteri 14 539 taýarlarǵa arnalǵan deklaratsııa resimdegen. Bul byltyrǵyǵa qaraǵanda 16,2 paıyzǵa óskendigin kórsetip otyr.
«Departamenttiń keden beketteri arqyly 174 865 júk avtokólik ótip, ótken jylmen salystyrǵanda 63,7 paıyzǵa ósken. Sondaı-aq, 244 310 jeńil avtokólik shekaradan ótken. Budan ózge, 17 019 264 azamat shekaradan ótip, byltyrǵyǵa qaraǵanda 46,8 paıyzǵa kóbeıgen. Keden beketterinde kezekte turǵan avtokólik quraldarynyń ótýin jyldamdatý maqsatynda keden beketine qosymsha qyzmetkerler men jumys oryndary kóbeıtildi. Sondaı-aq, avtokólik quraldarynyń ótkizý qabilettiligin arttyrý maqsatynda, 2019 jyldyń aqpan aıynan bastap «B.Qonysbaev» ótkizý pýnktiniń qaıta qurý qurylysynyń bastalýy josparlanýda. Bul jobada avtokólikterdiń kirip-shyǵý jolaqtaryn 2-den 6 jolaqqa deıin ulǵaıtý qarastyrylǵan», - dedi Eldos Ermaǵanbetuly.
Departamenttiń qyzmet etý aımaǵynda Eýrazııalyq ekonomıkalyq odaqtyq keden shekarasy arqyly ótkizilgen taýarlar men tulǵalarǵa qatysty 514 ákimshilik is qozǵalǵan. Odan basqa, 33 fakti boıynsha qylmystyq is qozǵalyp, onyń ishinde, 31 fakti boıynsha esirtki zattardy tasymaldaýǵa qatysty, 1 fakti medıtsınalyq preparattar boıynsha jáne 1 fakti boıynsha ekonomıkalyq kontrabandaǵa qatysty qylmystyq ister bolyp otyr.
Sonymen qatar, kedendik rásimderdi jańǵyrtý men kedendik jáne salyqtyq ákimshilendirý avtomattandyrý júıeleri jańartylyp keledi.
