Túrkistan oblysy men Ózbekstan arasynda saýda-sattyq damyp keledi

TÚRKІSTAN. QazAqparat – Túrkistan oblysy men Ózbekstan Respýblıkasy arasyndaǵy saýda qatynastaryn odan ári damytý maqsatynda jalpy somasy 50 mln AQSh dollaryn quraıtyn 3 eksporttyq kelisimshartqa qol qoıyldy. Bul kelisim Ózbekstan men Qazaqstannyń aımaqaralyq yntymaqtastyǵynyń 2-shi forýmynda júzege asyryldy, dep habarlaıdy QazAqparat tilshisi.

Ózbekstan Respýblıkasynyń Úrgenish qalasynda Úkimet basshylarynyń qatysýymen ótip jatqan «Agroónerkásiptik kooperatsııa, ónerkásip jáne týrızm salasyndaǵy aımaqtyq bıznestiń yntymaqtastyǵy» forýmynda óge de mańyzdy máseleler talqylandy. Forým aıasynda eki eldiń jetekshi kásiporyndarynyń kórmesi ótip jatyr. Onda Túrkistan oblysynyń kásipkerleri forým qatysýshylaryn óz ónimderimen jan-jaqty tanystyrýda. Týrıstik kompanııalar óz kezeginde týrıstik jarnamalyq materıaldaryn qoıyp, ońtústik óńiriniń týrıstik áleýetin nasıhattaýǵa múmkindik aldy. Bul shara kórshi elder arasyndaǵy saýda-ekonomıkalyq qatynastardy nyǵaıtyp, ózara tıimdi yntymaqtastyq qarqynyn arttyra túsýge yqpal eteri sózsiz. Sondaı-aq, jaqyn kúnderi Túrkistan oblysy ákimdiginiń bastamasymen Ózbekstan Respýblıkasyna transformator jabdyqtary men kúrketaýyq etin jáne muzdatylǵan sıyr etin jetkizý bastalmaq.