Túrkistan oblysy qylmys eń az jasalatyn óńir – statıstıka

NUR-SULTAN. QazAqparat – Bıylǵy birinshi toqsanda Qazaqstanda 54 990 qylmys tirkeldi. Bul, ótken jyldyń uqsas kezeńimen salystyrǵanda 23,9% az, dep habarlaıdy QazAqparat QR Ulttyq ekonomıka mınıstrligi Statıstıka komıtetine silteme jasap.

QR Bas prokýratýrasynyń Quqyqtyq statıstıka jáne arnaıy esep komıtetiniń derekteri boıynsha, birinshi toqsanda respýblıkadaǵy qylmys deńgeıi 10 myń turǵynǵa shaqqanda 118 tirkelgen qylmysty qurady. Oblystar men respýblıkalyq mańyzy bar qalalar bólinisinde 10 myń turǵynǵa shaqqandaǵy eń joǵary qylmys deńgeıi Almaty, Shymkent, Nur-Sultan, Shyǵys Qazaqstan, Batys Qazaqstan, Qostanaı jáne Aqmola oblystarynda, eń tómengi kórsetkish - Túrkistan oblysynda.

«Aýyr jáne asa aýyr qylmystar sany ótken jyldyń uqsas kezeńimen salystyrǵanda 119,8% artty. Qylmystar qurylymynda olardyń úles salmaǵy 20,3% (2019 jyldyń 1-toqsanynda - 9,3%), aýyrlyǵy ortasha jáne tómen 33,8% (66,5%) jáne 12,4% (14.0%) boldy», - delingen aqparatta.

Qylmystardyń arasynda eń úlken úlesti menshikke qarsy qylmystar quraıdy - 72,7% (2019 jyldyń birinshi toqsanynda - 76,4%), olardyń kópshiligi basqa bireýdiń múlkin urlaýǵa qatysty boldy - 23,7 myń oqıǵa (39,4 myń). Sondaı-aq alaıaqtyq jaǵdaılary 10,2% artty.

Adamǵa qarsy qylmystar sany 3230 oqıǵany qurady, bul ótken jyldyń sáıkes kezeńimen salystyrǵanda 9,8% az. Adam saýdasy - 50,0%, zorlaý - 36,6%, adam urlaý - 34,8%, qorqytý 19,5% tómendedi.

Al adam óltirý qylmystary ótken jylmen salystyrǵanda 26,1% kóbeıgen.

«Respýblıkada adam óltirý deńgeıi 100 myń turǵynǵa shaqqanda 1,5 quraıdy. Oblystar men respýblıkalyq mańyzy bar qalalar bólinisinde 100 myń adamǵa shaqqandaǵy adam óltirýdiń eń joǵary deńgeıi Pavlodar, Jambyl, Qaraǵandy, Aqmola oblystarynda, eń tómeni Túrkistan oblysynda baıqalady», - delingen resmı statıstıkada.

Respýblıkanyń quqyq qorǵaý organdary qylmys jasaǵan 21,2 myń adamdy anyqtady (2019 jyldyń 1-toqsanymen salystyrǵanda 17,5% az), 9,2 myń adam qylmystyq jaýapkershilikke tartyldy (5,6% az). Qylmys jasaǵan barlyq anyqtalǵan adamdardyń kópshiligi jumyssyzdar - 83,8% (2019 jyldyń birinshi toqsanynda 84,2%) qurady.

Ortasha alǵanda Qazaqstanda qylmys jasaǵan árbir segizinshi adam – mas kúıinde, árbir toǵyzynshy adam top quramynda bolǵan.

Qylmys jasaǵan adamdardyń jalpy sanynan 510 adam nemese 2,4% - kámeletke tolmaǵandar, bul ótken jyldyń sáıkes kezeńimen salystyrǵanda 25,2% az.

Qylmysqa barǵandardyń: 89-y – 14-15 jastaǵy balalar (2019 jyldyń birinshi toqsanynda - 162) nemese kámeletke tolmaǵan quqyq buzýshylardyń 17,5%, 421-i – 16-17 jastaǵylar nemese 82,5%.