Túrkistan oblysy qurylǵaly beri egis kólemi 12 myń gektarǵa artty
TÚRKІSTAN. QazAqparat – Túrkistan oblysynyń agroónerkásip kesheni respýblıkada erekshe oryn alyp, egis kólemi 12 myń gektarǵa artqan. Bul týraly oblystyq aýyl sharýashylyǵy basqarmasynyń basshysy Nurbek Badyraqov málimdedi, dep habarlaıdy QazAqparat tilshisi.
Nurbek Badyraqovtyń aıtýynsha, elimizdegi aýyl sharýashylyǵynyń jalpy ónimi kóleminiń 12%-y oblysqa tıesili. Munda aǵymdaǵy jyly aýyl sharýashylyǵy daqyldary 825,4 myń gektarǵa egilgen.
«2020 jyldyń 5 aıynyń qorytyndysy boıynsha óńirdegi aýyl sharýashylyǵynyń jalpy ónimi 140 mlrd teńgeni qurap, respýblıkadaǵy úlesi 15%-ben ekinshi oryndy ıemdendik. Jyl sońyna deıin aýyl sharýashylyǵy ónimi ótken jyldan 77 mlrd teńgege artyp, 706 mlrd teńge kóleminde bolady dep mejelengen. Búgingi kúnge ónim jınaý naýqany bastalyp, 2,2 myń tonna baqsha, 245,4 myń tonna kókónis, 22,3 myń tonna kartop jınaldy. Odan bólek 727,2 myń tonna mal azyǵy daıyndaldy», - dedi Nurbek Baqtybaıuly.
Sondaı-aq, aǵymdaǵy jyly oblys boıynsha masaqty daqyldardan 477,4 myń tonna, dándik júgeriden 202,8 myń tonna, maqsarydan 74,4 myń tonna, maqtadan 334,8 myń tonna, kókónis, baqsha, kartoptan 2 mln 760 myń tonna ónim alý josparlanǵan.
«Al, tamshylatyp sýǵarý ádisi qosymsha 1,7 myń gektarǵa ulǵaıyp, jalpy kólemi 19,3 myń gektarǵa jetken. Jylyjaılar 55,02 gektarǵa salynyp, jalpy kólemi 1 168 gektardy quraǵan. Búgingi kúnge, jylyjaılarda jalpy 88,2 myń tonna ónim óndirilgen. Sharýalarǵa kóktemgi dala jumystaryn júrgizýge 21 myń tonna janarmaı berilgen. Memleket basshysynyń tapsyrmasyna sáıkes, sáýir aıynan bastap janarmaı baǵasy lıtrine 160 teńgege bekitilip, naryqtyq baǵadan 25 teńgege arzan boldy»,- dedi basqarma basshysy.
