Túrkistan oblysy kóktemgi sý tasqynyna daıyndyq sharalaryn júrgizip jatyr

Otyrar aýdanynda ótken oqý-jattyǵý sharasynda mamandar 7 aýdannyń tehnıkasynyń qazirgi jaǵdaıy, olardyń tehnıkalyq qabileti týraly baıandap, halyqty evakýatsııalaý men maldardy kóshirý jumystaryn pysyqtady. Budan bólek, sý tasqyny táýekeliniń aldyn alý boıynsha daıyndyq jumystary júrgizilip, veterınarııa uıymdarynyń tótenshe jaǵdaıǵa tolyq daıyndyǵy baıandaldy. Syrdarııa ózeniniń jaǵasyn sý basý qaýpi týyndaǵan jaǵdaıda 22 eldi mekende qaýipsizdik sharalary qolǵa alynyp, 17 myńdaı halyq evakýatsııalyq beketterge kóshiriledi. Keshendi oqý-jattyǵý jumystary barysynda oblys ákimdigi janynan qurylǵan Sıtýatsııalyq ortalyq jáne TJD birlesip jasaǵan daǵdarysqa qarsy kartada bolýy yqtımal 200-den asa tótenshe jaǵdaı oqıǵasy sıpattalǵan.

Aımaq basshysynyń qatysýymen ótken jedel shtabta Ómirzaq Shókeev tótenshe jaǵdaıǵa daıyndyqty pysyqtap, antıkrızıstik kartanyń óńir úshin mańyzy zor ekenin atap ótti. Osyndaı keshendi oqý-jattyǵý jumystaryn endi aı saıyn ótkizýdi tapsyrdy.

«Apat aıtyp kelmeıdi», qazir jeti aýdanda qaýip bar. Syrdarııanyń boıynda qaýip bar. Sondyqtan qazirden bastap áreket etý kerek. Jaǵdaı naýryz aıynyń ortasyna taman kúrdelenýi yqtımal. Shardaradan sý jiberiledi. Syrdarııanyń boıynda kóptegen aýyldar bar. Osy bastan saqtyq sharalaryn qolǵa alý kerek. Biz Arys, Maqtaaral aýdandaryndaǵy tehnogendik, Tólebı aýdanyndaǵy tabıǵı sý tasqyny kezinde atqarylǵan jumystardan mol tájirıbe jınadyq. Tótenshe jaǵdaıdyń aldyn alý úshin Shtab qurylady. Shtab quramyna kiretin barlyq salalyq qyzmetter «Altyn saǵat» erejesine sáıkes jumys júrgizýi qajet. Antıkrızıstik karta sheńberinde tótenshe jaǵdaımen kúres algorıtmi bekitilgen. Barlyq aýdan, qala ákimderi algorıtmmen jiti tanysyp, nusqaýlyq arqyly jumys isteýi qajet», - dedi Ómirzaq Shókeev.