Túrkistan oblysy keden beketterinde koronavırýsty anyqtaıtyn teplovızorlar jumys istep tur

TÚRKІSTAN. QazAqparat – Túrkistan oblysy boıynsha Memlekettik kirister departamentiniń keden beketterinde koronavırýsqa baılanysty joǵary deńgeıdegi saqtyq sharalary qabyldandy. Barlyq ótkizý pýnktilerinde sanıtarııalyq baqylaýdy kúsheıtý maqsatynda beketterge jergilikti aýdandyq sanıtarııalyq baqylaý mamandary jumyldyrylyp, olar táýlik boıy qyzmet atqarýda, dep habarlaıdy QazAqparat tilshisi.

Atap aıtqanda, barlyq qyzmetkerler bir rettik medıtsınalyq maskalarmen qamtamasyz etilgen. Sonymen qatar, ár ótkizý pýnktterde adamdardyń dene qyzýyn qashyqtyqtan ólsheıtin 3 dana teplovızor jumys isteýde.

Jalpy oblystaǵy barlyq ótkizý beketterinde 15 dana teplovızorlyq beınekameralar men qosymsha 3 dana qolmen ólsheý qurylǵysy bar. Bul «KKarina.R.KZ» dep atalatyn júıe tolyǵymen avtomattandyrylǵan. Dene qyzýy kóterilgen azamattardy 15 metr qashyqtyqtan birden anyqtaıdy. Ony maman arnaıy ekrannan tolyq qadaǵalap otyrady.

Beketten ótip jatqan jeke tulǵadan dene qyzýy anyqtalsa, teplovızorlyq kamerelar dabyl qaǵady. Tez arada shara qabyldaý úshin medıtsına qyzmetkerlerine habarlanady.

Aıta keteıik, 31 qańtar men 6 naýryz aralyǵynda Túrkistan oblysy boıynsha MKD ótkizý beketterinen Qazaqstan Respýblıkasyna 619 320 adam kirgen. Olardyń arasynda dene qyzýy kóterilgen jolaýshy bolǵan joq.