Túrkistan oblysy: Ferdaýsı mektebindegi jaǵdaı turaqtandy
TÚRKІSTAN. QazAqparat - Túrkistan oblysy, Maqtaaral aýdany Ferdaýsı eldi mekeninde ornalasqan A.Ferdaýsı atyndaǵy jalpy orta mektebindegi jaǵdaı turaqtandy, dep habarlaıdy QazAqparat oblystyq bilim basqarmasyna silteme jasap.
«A.Ferdaýsı atyndaǵy jalpy orta mektepte 700 oqýshy bilim alsa, sonyń 371-i - qyz balalar. Olardyń barlyǵy derlik mektepke dinı atrıbýttyq belgileri bar formamen kelip júrgen. Júıeli jumystyń nátıjesinde 4 qyrkúıek kúni bastaýysh synypta oqıtyn (1-4 synyptar) qyz balalardyń barlyǵy talapqa sáıkes formaǵa kóshti. Al, joǵary synypta oqıtyn qyz balalardyń 165-i biryńǵaı mektep formasyn saqtap, sabaqqa qatysyp otyr. Sondaı-aq, mektep formasyn saqtamaǵan 60 qyz balamen mamandar jumys júrgizip jatyr» delingen oblystyq bilim basqarmasy taratqan habarlamada.
Bilim jəne ǵylym mınıstriniń «Orta bilim berý uıymdary úshin mindetti mektep formasyna qoıylatyn talaptardy bekitý» týraly 2016 jylǵy 14 qańtardaǵy buıryǵyn saqtaý týraly túsindirý jumystary turaqty túrde júrgizilgen. Máseleni sheshý úshin aýdan ákimdigi jáne oblystyq bilim, ishki saıasat, otbasy, balalar jáne jastar isi jónindegi basqarmalarynyń qatysýymen arnaıy jumysshy top qurylyp, naqty is-shara jospary bekitildi. Toptyń quramyna oblystyq deńgeıdegi quqyq qorǵaý organdarynyń qyzmetkerleri de qosyldy.
A.Ferdaýsı atyndaǵy jalpy orta mektepte 3 qyrkúıekten bastap biryńǵaı mektep formasyn saqtamaǵan oqýshylarǵa bilim uıasyna kirýge tyıym salyndy. Sondaı-aq, 3 kún boıy mektepten qalǵan oqýshylardyń ata-analaryna aıyppul salý sharalary júrgizilip jatyr.
«Narazylyq tanytqan aýyl turǵyndaryna jumysshy toptyń músheleri túsindirý jumystaryn jan-jaqty júrgizdi. Memlekettik organdar men dinı birlestik mamandary da ata-analar qaýymy, aýyl bıleri jəne zııaly qaýym ókilderimen birge jıyndar ótkizip, zaıyrly memlekettiń bilim uıalaryndaǵy ortaq standarttardy saqtaý talaby túsindirildi. Arnaıy barǵan 40 psıholog maman muǵalimdermen jáne oqýshylardyń árbirimen jumys istep, zaıyrly eldegi eń basty qundylyq - memleket zańyna baǵyný ekenin aıtty. Kúızeliske qarsy turý jáne onyń aldyn alý boıynsha túsindirý jumystary men trenıngter ótkizilýde. Búginde oblystyq bilim basqarmasy men jergilikti ákimdik tarapynan áleýmettik jospar jasalǵan. Qyrkúıektiń 7-sinen bastap oqýshylar sporttyq jáne mádenı is-sharalarǵa qatysady» dep habarlady Túrkistan oblystyq bilim basqarmasy.
Aıta keteıik, jańa oqý jyly qarsańynda A.Ferdaýsı atyndaǵy jalpy orta mektep ǵımaratynyń ashylý saltanaty ótti. Bıyl respýblıkalyq bıýdjetten 600 oryndyq bilim uıasyna 1 mlrd 350 mıllıon teńge bólinip, sońǵy úlgidegi oqý orny salynǵan bolatyn.
