Túrkistan oblysy et eksporttaýdan respýblıkada kósh bastady
TÚRKІSTAN. QazAqparat - Túrkistan oblysy et eksporttaýdan respýblıkada kósh bastady. Óńirde ótken jyly 9600 tonna et Ózbekstan, Reseı, Iran, BAÁ elderine eksporttalyp, respýblıkadaǵy úlesi 54 paıyzǵa jetti, dep habarlaıdy óńirlik ákimdiktiń baspasóz qyzmeti.
Túrkistan oblysy ekonomıkasynyń draıveri bolyp tabylatyn aýyl sharýashylyǵynda ótken jyly jalpy ónim kólemi 544,3 mlrd teńgeni qurap, 2017 jylmen salystyrǵanda 5,3 paıyzǵa artqan. Atap aıtqanda, mal sharýashylyǵynda et óndirisi - 4,8 paıyzǵa, sút - 2,8 paıyzǵa, jumyrtqa - 8,1 paıyzǵa artyp otyr.
Sonymen qatar, egin sharýashylyǵynda ótken jyly 286,3 mlrd. teńgeniń ónimi óndirilip, 2017 jylmen salystyrǵanda 6,5 paıyzǵa artyp otyr. 2018 jyly aýyl sharýashylyǵy daqyldarynyń egis kólemi 807,4 myń gektarǵa ornalastyrylyp, 2017 jylmen salystyrǵanda 9 myń gektarǵa kóbeıgen.
Nátıjesinde, 2018 jyly aýa raıynyń qýańshylyq bolǵanyna qaramastan, dıhandardyń eseli eńbeginiń arqasynda masaqty dándi daqyldardyń ár gektarynan 17,8 tsentnerden 405 myń tonna ónim tústi. Maqta daqylynyń gektar túsimdiligi 25,7 tsentnerden barlyǵy 340,7 myń tonna maqta jınalǵan. Kókónis, kartop, baqsha daqyldarynan 2,9 mln. tonna ónim jınalyp, rekordtyq kórsetkishke qol jetkizildi.
Sondaı-aq, qarqyndy baýlardyń kólemi 2800 gektarǵa jetkizilip, respýblıkadaǵy jemis-jıdektiń 40 paıyzy, júzimniń 73 paıyzy Túrkistan oblysynda jınaldy.
