Túrkistan oblysy ekonomıkasyna úles qosyp júrgen kásiporyndarǵa qoldaý kórsetilýde
TÚRKІSTAN. QazAqparat - Túrkistan oblysy ákiminiń orynbasary Meırjan Myrzalıev «Qazatomprom» UKP» AQ-na qarasty enshiles kásiporyndardyń basshylarymen kezdesti. Basqosýda óndiris kólemin ulǵaıtý men jumys oryndaryn saqtaý máseleleri talqylandy, dep habarlaıdy QazAqparat tilshisi.
Kezdesýde sonymen qatar eksport kólemin ulǵaıtý, jergilikti qamtý úlesin arttyrý jaıy sóz boldy. Aıta keteıik, «Qazatomprom» UKP« AQ-na qarasty enshiles kásiporyndardyń óndirgen ónim kólemi oblystyń áleýmettik-ekonomıkalyq damýynda erekshe oryn alady. Óńirdegi ónerkásip óniminiń 55%, ken óndirý men karerlerdi qazý salasynda 97,6% jáne metallýrgııa ónerkásibiniń óńdeý ónerkásibindegi 28% úlesi «Qazatomónerkásip» UAK» AQ-na qarasty kásiporyndarǵa tıesili.
Kompanııa usynǵan málimetke sáıkes, pandemııalyq jaǵdaıǵa baılanysty jyl sońyna deıin ýran óndirý kólemi Túrkistan oblysynda 88 %-ǵa deıin tómendeýi kútilýde. Kezdesý barysynda atalǵan jaǵdaıdyń aldyn alý sharalary ortaǵa salynyp, jumys josparlary tanystyryldy.
Aldaǵy ýaqytta ınvestıtsııa tartý, eksport, jergilikti qamtý, ónim kólemderin ulǵaıtý jáne jumys oryndaryn keńeıtý boıynsha ózara memorandýmǵa qol qoıý josparlanyp otyr. Bul sharalar ulttyq kompanııalardyń memlekettik satyp alýlarynda otandyq taýarlardy qoldanýyn qamtamasyz etý maqsatynda uıymdastyrylýda. Kompanııanyń bıylǵy jylǵy memlekettik satyp alý jospary 75 mlrd teńgeni quraǵan.
