Túrkistan oblysy Covid-19-dy anyqtaýda táýligine 5000 test ótkizýge daıyn
TÚRKІSTAN. QazAqparat – Túrkistan oblysynyń medıtsınalyq uıymdarynda ornalasqan zerthanalar táýligine Covid-19-dy anyqtaý úshin 5000 test ótkizýge daıyn. Oblys boıynsha táýligine PTR-test júrgizetin 10 zerthana jumys isteýde, dep habarlaıdy QazAqparat tilshisi.
Oblystyq Qoǵamdyq densaýlyq basqarmasynyń basshysy Marat Pashımovtyń sózinshe, óńirde pandemııa bastalǵaly kúni búginge deıin barlyǵy 240 myńǵa jýyq test ótkizilgen.
«Aımaqta pandemııanyń ekinshi tolqynyna daıyndyq jumystary kúsheıtilgen. Infektsııalyq statsıonarlarda naýqastardy qabyldaýǵa 600 tósek-oryn ázirlengen. Sondaı-aq, 340 oryndyq karantındik statsıonar qosyldy. Jalpy, epıdemııanyń yqtımal órshýin eskere otyryp, oblys boıynsha 6000-ǵa jýyq tósek-oryn qarastyrylǵan. Budan basqa, barlyq emdeý mekemeleri dári-dármekterdiń eki-úsh aılyq qorymen qamtamasyz etilgen»,- dedi basqarma basshysy.
Aıta keteıik, aımaqta kúni búginge deıin koronavırýs ınfektsııasyn juqtyrǵan 3430 jaǵdaı tirkelgen. 3362 naýqas saýyǵyp ketken. Sońǵy bir táýlikte indettiń sımptomsyz túrimen 2 naýqas tirkelgen. Infektsııalyq statsıonarlarda qazir 44 naýqas em qabyldaýda. Onyń ishinde 1 naýqas koronavırýs ınfektsııasyna, qalǵandary vırýsty pnevmonııaǵa shaldyqqandar.
