Túrkistan oblysy boıynsha 2000-ǵa jýyq medıtsına qyzmetkerine ústemeaqy tólendi
NUR-SULTAN. QazAqparat - Memleket basshysy Qasym-Jomart Toqaevtyń koronavırýspen kúresip jatqan medıtsına qyzmetkerlerine kómek kórsetý týraly tapsyrmasyna sáıkes, Túrkistan oblysynda 1994 dáriger ústemeaqy aldy, dep habarlaıdy oblystyq ákimdiktiń baspasóz qyzmeti.
COVID-19 ınfektsııasymen kúreste aıanbaı eńbek etip júrgen mamandar jumys qaýiptiligine qaraı 3 topqa bólingen.
Táýekeldiń birinshi tobyna óte qaýipti jaǵdaıda jumys isteıtin 27 qyzmetker endi. Ekinshi sanat qaýiptiligindegi dárigerler men feldsherlerge, ıaǵnı, 337 medıtsına mamandaryna ústemaqy tólendi. Úshinshi topqa 1630 qyzmetkeri enip otyr. Ústemaqy alǵandar reanımatsııa bólimderin qosa alǵanda, juqpaly aýrýlar statsıonarlarynyń dárigerleri, karantındik aımaqtaǵy orta jáne kishi býyn medıtsına qyzmetkerleri. Sondaı-aq provızorlyq statsıonar men jedel járdem qyzmetiniń dárigerleri jáne jedel-járdem júrgizýshileri.
Qazyǵurt aýdandyq ortalyq aýrýhanasynyń bas dárigeri ári oblystyń bas ınfektsıonıst - dárigeri Baqtyǵalı Erejepov qıyn sátte tapjylmaı indetpen kúresip júrgen ujymdaǵy ár qyzmetkerdiń erligin jáne tabandylyǵyn erekshe baǵalaıtyndyǵyn aıtýda.
«Qazyǵurt aýdanynyń medıtsına qyzmetkerlerine bólingen barlyq dárigerler men orta jáne kishi býyn qyzmetkerlerimiz ústemaqylaryn alyp jatyr. Memleket basshysynyń tapsyrmasyna sáıkes berilip jatqan bul qarjylaı kómek jáne yntalandyrý sala mamandaryna úlken qoldaý boldy», - deıdi oblystaǵy ár naýqasty ózi jeke baqylap, dárigerlik em kórsetip qana qoımaı, jyly sózimen úmit syılap júrgen joǵary bilikti ınfektsıonıst-dáriger Baqtyǵalı Aıýbaıuly.
Atalǵan aýrýhanaǵa qarasty provızorlyq gospıtaldyń dárigeri Baqyt Aqynǵazıeva 2 sanat boıynsha 425 myń teńge ústemaqy aldy. Asyl jar, 4 balanyń anasy qarýsyz maıdanda adam ómirin arashalap júrgen aq jeleńdi abzal jan bir aıǵa jýyq ýaqyt jaqyn týystaryn kórmegen. Óz kásibı qyzmetin basty mindet sanaıtyn aq jelekti abzal jan barlyq áriptesteriniń atynan alǵysyn bildiredi.
