Túrkistan oblysy bıznes júrgizýden kósh bastap tur
TÚRKІSTAN. QazAqparat - Jyl saıyn dúnıejúzi memleketteriniń bızneske qolaılyǵy boıynsha «The World Bank Doing Business» reıtıngi jasalady. Onda Qazaqstan 190 memlekettiń arasynda 25-orynda tur, dep habarlaıdy Túrkistan oblysy ákiminiń baspasóz qyzmeti.
Kásipkerlik belsendiliktiń jaı-kúıi týraly elimizdiń oblystary men megapolıstary arasynda sýb-reıtıng júrgizilip, Túrkistan oblysy bıznes júrgizý úshin eń úzdik óńir bolyp tanyldy.
Bul reıtıngte Qazaqstan 10 krıterıı boıynsha baǵalanady. Óńirlerge retteýshi klımat, ınfraqurylym, bıznes úshin qarjynyń qoljetimdiligi, adamı kapıtal jáne qabyldanatyn sheshimderdiń transparenttiligi sııaqty 5 faktor boıynsha baǵa beriledi.
«Aıta keteıin, oblys ákimi Ómirzaq Shókeevtiń bıznes klımatty jaqsartý aıasyndaǵy tapsyrmalaryna sáıkes óńirde aýqymdy jumys júrgizilip, Túrkistan oblysy joǵary kórsetkishke ıe bolyp otyr. Bul bıznes salasyn jaqsartý aıasynda eńbektenip júrgen ár azamattyń, sonymen qatar otandyq ónim shyǵaryp, halyqty jumyspen qamtyp otyrǵan árbir kásipkerdiń jetistigi ekenin aıta ketý mańyzdy. Árıne, adal atqarylǵan eńbek elenbeı qalmaıdy. Oblysymyzdyń úzdik atalýy ár qaısymyzdy yntalandyryp, budan da bıik belesterdi baǵyndyrýǵa bastary sózsiz», - deıdi Túrkistan oblysy ákiminiń orynbasary Meıirjan Myrzalıev.
The World Bank Doing Business - bul dúnıejúzilik bank toby damýdyń barlyq negizgi salalarynda jumys isteıdi. Olar qarjy ónimderiniń keń aýqymyn jáne tehnıkalyq kómekti usynady, sondaı-aq elderge ınnovatsııalyq bilimdermen jáne olardyń aldynda turǵan problemalardy sheshýmen bólisýge jáne qoldanýǵa kómektesedi.
Túrkistan oblysynda 150 myńǵa jýyq kásipker tirkelgen. «Qarapaıym zattar ekonomıkasy» baǵdarlamasy boıynsha 246 joba 24,4 mlrd teńgege qarjylandyrylǵan. Al, 29 joba 5 mlrd teńgege maquldansa, 27 jobany 6,1 mlrd teńgege qarjylandyrý qaralýda. Sany boıynsha aýylsharýashylyq salasynda 77,4 %, tamaq ónerkásibi jáne qyzmet kórsetý salalary belsendi.
17 aýylsharýashylyǵy, eki týrızm jáne úsh tamaq ónerkásibi salasyndaǵy jobalar iske asyrylýda.
