Túrkistan oblysy - bıznes nysandarynyń sany boıynsha respýblıkada kóshbasshy

TÚRKІSTAN. QazAqparat - Túrkistan oblysy jumys istep turǵan shaǵyn jáne orta bıznes nysandarynyń sany boıynsha respýblıkada kóshbasshyǵa aınaldy, dep habarlaıdy QazAqparat óńirlik kommýnıkatsııalar qyzmetine silteme jasap.

Túrkistan oblysynyń Kásipkerler palatasy bıznes ókilderi aldynda kezdesý ótkizip, ótken jyldy qorytyndylady. Kezdesýge oblys ákiminiń orynbasary M.Myrzalıev, «Nur Otan» partııasy Túrkistan oblystyq fılıaly tóraǵasynyń birinshi orynbasary B.Tájibaev, sondaı-aq, óńirlik keńestiń, isker áıelder keńesiniń músheleri, ekinshi deńgeıli bankter, qarjy ınstıtýttary men quzyretti memlekettik organdardyń basshylary qatysty.

Kezdesýde Túrkistan oblysy Kásipkerler palatasynyń dırektorynyń orynbasary Mádı Ibadýllaev 2019 jyldyń basynan beri atqarylǵan jumystarǵa toqtaldy.

«Ózderińizge belgili, Túrkistan oblysy - qalyptasqan oń bıznes-klımaty bar shaǵyn jáne orta kásipkerlik óńiri. Bizdiń ólkedegi adamdar óte eńbekqor jáne isker. Búgingi tańda, oblys shaǵyn jáne orta bıznestiń jumys istep turǵan sýbektileriniń sany boıynsha kóshbasshy bolyp tabylady jáne olardyń sany ótken jylmen salystyrǵanda 8,5%-ǵa artqan»,-dedi ol.

Túrkistan oblysynyń Kásipkerler palatasy 2019 jyly 10 mıllıard teńge somasynda kásipkerlerdiń quqyqtary men múddelerin qorǵaǵan. Dırektor orynbasarynyń aıtýynsha, 2019 jyly palataǵa 560 ótinish kelip túsken, onyń 418-i oń sheshimin tapqan.

Aıta ketý kerek, «Eńbek» baǵdarlamasy aıasynda óńirde 12 579 adam oqýdan ótip, onyń 7 933 adamy grant ıegeri atanyp, jumyssyz halyqtyń 24%-y jumyspen qamtylǵan. Qysqamerzimdi oqytý baǵyty boıynsha 5 466 jumyssyz azamattar 3 aılyq oqý kýrstarynan ótip, 1 477 túlek 745,8 mıllıon teńge grant ıegeri atandy. Sonymen qatar, «Bastaý-Bıznes» jáne «Jas kásipker» jobalary sheńberinde 7 113 adam oqýdy aıaqtaǵan. Onyń aıasynda 2,7 mlrd teńge somasyna 401 joba iske asyrylyp, 3,2 mlrd teńge somasyna 6 456 túlekke grant berildi.

Kezdesý barysynda kásipkerler ózderin tolǵandyryp júrgen suraqtaryn qoıyp, jaýaptaryn aldy. Jıyn sońynda Kásipkerler palatasy men «Nur Otan» partııasynyń fılıalymen yntymaqtastyq týraly memorandýmǵa qol qoıyldy.

Sonymen qatar, Túrkistan oblysy kásipkerlikti damytýdyń 2020 jylǵa arnalǵan is-sharalar jospary bekitilip, qol qoıyldy.