Túrkistan oblysy: Báıdibekte taǵy 2 aýylǵa tabıǵı gaz jetti

BÁIDІBEK. QazAqparat – Túrkistan oblysynyń Báıdibek aýdanyna qarasty Tasqudyq jáne Boraldaı aýyldaryna gaz berildi. Eki aýylda 600-den astam otbasy turady, dep habarlaıdy QazAqparat.

Aýdan ákimi Erjigit Sháripbekov aýyl turǵyndarynyń qýanyshymen bólisti. Túrkistan oblysynyń keshendi damý baǵdarlamasyna sáıkes, 2025 jylǵa deıin Báıdibek aýdanyndaǵy eldi mekenderdi tabıǵı gazben qamtamasyz etý úlesin 92,3% jetkizý kózdelip otyr.

«Táýelsizdigimiz týyn tikken jyldardan beri elimizde, onyń ishinde bizdiń aýdanda kóptegen aýqymdy jumystar qolǵa alynyp, el ıgiligine paıdalanýǵa berilýde. Sonyń biri – Tasqudyq pen Boraldaı eldi mekenderinde júzege asyp otyr. Búgin mine, qýanyshty jaǵdaıdyń kýási bolyp otyrmyz», – dedi ol.

Aıta keteıik, Báıdibek aýdanyna 2015 jyly «Beıneý – Shymkent» magıstraldy gaz qubyrynyń qurylysy júrgizildi. Qarasha aıynda kógildir otynnyń alaýy jaǵylyp, aýdan ortalyǵy Shaıanǵa gaz berilgen bolatyn. Ótken jyldyń sońynda eki eldi meken tabıǵı gazǵa qosyldy. Búgingi Tasqudyq pen Boraldaıdy qosqanda qazirgi tańda aýdandaǵy 10 aýyl tabıǵı gazdy tutynyp otyr.

Qazirgi tańda 6 eldi mekenniń ishki gaz júıeleriniń qurylysy aıaqtalǵan. Bir eldi mekenge jetkizýshi jáne ishki gaz toraptarynyń qurylys jumystary tolyǵymen aıaqtalǵannan soń taǵy jeti eldi mekenge tabıǵı gaz beriledi dep kútilýde. Odan bólek, 13 eldi mekenniń JSQ-sy memlekettik saraptamadan ótýde. Jáne de 8 eldi mekenniń sáýlettik josparlaý tapsyrmalary ázirlenýde.