Túrkistan oblysy baspanamen qamtýda kósh basynda

TÚRKІSTAN. QazAqparat - Respýblıka boıynsha baspanamen qamtamasyz etý boıynsha eń joǵary kórsetkish Túrkistan oblysyna tıesili. Bıyl 548,4 myń sharshy metr turǵyn úı tapsyrylyp, túrkistandyqtar jańa baspanaǵa ıe boldy, dep habarlaıdy QazAqparat óńir basshysynyń baspasóz qyzmetine silteme jasap.

Osylaısha turǵyn úıdi iske qosýdyń jyldyq qorytyndysy jospardan tys oryndalyp, «Nurly jer» memlekettik turǵyn úı baǵdarlamasy tolyǵymen iske asyryldy. Qańtar – qarasha aıynyń qorytyndysymen oblys aýmaǵynda 4356 páter paıdalanýǵa berilgen.

Oblystaǵy memlekettik «Nurly jer» baǵdarlamasynyń sapaly oryndalýy Túrkistan oblysy basshylyǵy tarapynan qatań baqylaýǵa alynǵan. Baǵdarlama aıasynda memlekettik bıýdjet esebinen 158 nysannyń qurylysyna 36,6 mlrd. teńge bólindi. Qarjy 40 arendalyq turǵyn úı qurylysyna, 30 ınjenerlik ınfraqurylym nysany, 89 kredıttik turǵyn úıdiń qurylysyna baǵyttaldy. Jyl qorytyndysy boıynsha 69 nysan paıdalanýǵa tapsyrylady. Nátıjesinde 2430 otbasy baspanamen qamtamasyz etilip, 3604 jeke jer ýchaskelerine ınfraqurylym júıeleri júrgiziletin bolady.

Memlekettik bıýdjet esebinen 1778 páterli satyp alý quqyǵynsyz arendalyq 40 kópqabatty turǵyn úılerdiń qurylysy júrgizilýde. Arendalyq 14 turǵyn úı paıdalanýǵa tapsyryldy. Atap aıtsaq, Kentaý qalasynan 10 úı, Túlkibas pen Shardara aýdanynan 1 turǵyn úıden jáne Saryaǵash aýdanynda 90 páterli 2 kópqabatty úı paıdalanýǵa berildi.

Túrkistan oblysy aýmaǵynda áleýmettik kredıttik turǵyn úıdi damytý maqsatynda 7 qabatty 24 turǵyn úıdiń qurylysy júrgizilýde. Nátıjesinde 1452 otbasy qonys toıyn toılaıdy. Sonymen qatar, Túrkistan qalasy ákimshilik iskerlik ortalyǵynda jańadan 7, 9 jáne 12 qabatty 64 turǵyn úı salynýda. 4 myńǵa jýyq páterli baspanalardyń jalpy aýmaǵy – 240,8 myń sharshy metr.