Túrkistan oblysy bala týý men tabıǵı ósim boıynsha kósh bastap tur

NUR-SULTAN. QazAqparat - 2020 jyldyń 1 qyrkúıegindegi esep boıynsha Túrkistan oblysy halqynyń sany 2 036 029 adamdy qurady. Onyń ishinde qalalyq jerde 412 819 adam (20,3%), aýyldyq jerde 1 623 210 adam (79,7%) bar, dep habarlaıdy oblystyq ákimdiktiń baspasóz qyzmeti.

Ótken jyldyń tıisti ýaqytymen salystyrǵanda halyq sany 1,4%-ǵa ósken. Respýblıka boıynsha oblys týý men tabıǵı ósim kórsetkishteri boıynsha 1-orynda. Bul týraly Óńirlik kommýnıkatsııalar qyzmetinde oblystyq Statıstıka departamentiniń basshysy Aıdar Ábildabekov málimdedi.

Budan ózge, 2020 jyldyń ІІ toqsanynda Túrkistan oblysy boıynsha bir qyzmetkerdiń ortasha aılyq ataýly jalaqysy - 168 301 teńgeni quraǵan.

«Eń joǵary ortasha aılyq jalaqy Sozaq aýdanynda - 243 324 teńge bolyp belgilense, eń tómen jalaqy Saryaǵash aýdanynda – 137 498 teńge kóleminde. 2020 jylǵy ІІ-shi toqsanda eń joǵary aılyq jalaqy «Karjy jáne saqtandyrý» salasynda - 220 355 teńge bolyp belgilense, eń tómeni «Jyljymaıtyn múlikpen jasalatyn operatsııalar» salasynda - 70 121 teńge. Oblysta azyq-túlik taýarlarynyń baǵalary - 7,1%-ǵa, azyq-túlik emes taýarlary – 3%-ǵa, aqyly qyzmetter – 5,5%-ǵa qymbattaǵan», - dedi departament basshysy.

Sonymen qatar, 2020 jyldyń qańtar-maýsym aılary boıynsha Túrkistan oblysynyń jalpy óńirlik ónim kólemi 770 mlrd. teńgeni qurap, naqty kólem ındeksi boıynsha oblys respýblıkada birinshi oryndy ıemdengen. Jalpy óńirlik ónimniń qurylymynda ónerkásiptiń úlesi – 19,7%, aýyl, orman jáne balyq sharýashylyǵy – 14,6%, bilim berý – 12,7%-dy alyp otyr.

Aǵymdaǵy jyldyń qańtar-qyrkúıek aralyǵynda Túrkistan oblysy boıynsha negizgi kapıtalǵa salynǵan ınvestıtsııa kólemi - 414 mlrd 53 mln. teńgege jetip, 2019 jyldyń tıisti kezenimen salystyrǵanda 66,7%-ǵa artqan. Negizgi ınvestıtsııalyq salymdardyń 86,2%-yn shaǵyn kásiporyndar júzege asyrǵan.