Túrkistan oblysy aýyl sharýashylyǵyna tartylǵan ınvestıtsııa kólemi jaǵynan kósh bastap tur

TÚRKІSTAN. QazAqparat  - Bul týraly Túrkistan oblysy ákimdiginde ótken apparattyq májiliste aıtyldy, dep habarlaıdy QazAqparat óńir basshysynyń baspasóz qyzmetine silteme jasap.

 Oblys ákimi Ómirzaq Shókeevtiń tóraǵalyq etýimen ótken jıynda aldymen Arys qalasyn qalpyna keltirý jumystary talqylandy. Arystaǵy jaramsyz dep tanylǵan 474 turǵyn úıdiń 402 -ń qurylysy tolyq aıaqtalǵan. Sala mamandarynyń zertteý-zerdeleý nátıjesinde turýǵa jaramsyz dep tanylyp, súrilgen taǵy 72 úıdiń qurylys jumystary áli jalǵasyp jatyr. Nur-Sultan men Shymkent qalalaryna tıesili bul nysandarda qurylysshylar eki aýysymda eńbek etip jatyr.

Jınalysta sondaı-aq, oblys ákiminiń tikeleı tapsyrmasymen júrip jatqan Túrkistan qalasyn kógaldandyrý jumystaryna qatysty aýqymdy sharalar da talqylandy. Sońǵy málimetterge sáıkes, qalanyń aýmaǵyn qoqystan tazartý men kóshe boılaryn jáne aryq-atyzdardy qalpyna keltirý maqsatynda uıymdastyrylǵan senbilikke oblystyń barlyq aýdan-qalasynan 4 myńnan astam adam qatysqan. Osy rette aımaq basshysy Ómirzaq Shókeev atalǵan sharaǵa barlyq ákimdik pen basqarma qyzmetkerleriniń tolyq atsalysýyn tapsyrdy. Búgingi tańda oblys ortalyǵynyń  aýmaǵynda ákimshilik tarapynan 50 myńǵa jýyq kóshet otyrǵyzylǵan. Olardy turaqty sýǵaryp turý  úshin 268 sý uńǵymasyn salý kózdelgen.

Apparat májilisinde  sonymen qatar oblystaǵy aýyl sharýashylyǵy salalarynyń 9 aılyq jumys qorytyndysy da sóz boldy. Sońǵy kórsetkishter boıynsha, óńirdegi jalpy ónim kóleminiń ındeksi men tamaq ónimderi óndirisiniń negizgi kapıtalǵa tartylǵan ınvestıtsııalardyń naqty kólemi, iri qara men usaq múıizdi mal basynyń úlesi sekildi damý ındıkatorlarynyń oryndalýy barysy baıandaldy. Bul baǵytta Túrkistan oblysy jaqsy jetistikterge qol jetkizgen. Aýyl sharýashylyǵy negizgi kaptıtalǵa tartylǵan ınvestıtsııalardyń kólemi jaǵynan da respýblıka boıynsha alǵashqy orynda.

Jınalysty qorytyndylaǵan Ómirzaq Shókeev  jaýapty mamandarǵa maqta qunyna baılanysty týyndaǵan máseleni tez arada sheshýdi tapsyrdy. 

 Aıta keteıik, oblysta Maqtaaral, Jetisaı, Shardara aýdandarynda turatyn 300 myńnan astam halyq maqta sharýashylyǵymen aınalysady. Búginde bul aýdandarda 18 maqta óńdeý zaýyty jumys istep tur.