Túrkistan oblysy aýrýhanalarynda 9 myń tósek-orynnyń 25 paıyzy bos tur
TÚRKІSTAN. QazAqparat – Túrkistan oblysyndaǵy aýrýhanalarda 9 myń tósek-orynnyń 25 paıyzy bos tur. Bul týraly oblys ákiminiń orynbasary Sáken Qalqamanov Facebook jelisindegi tikeleı efırde málimdedi, dep habarlaıdy QazAqparat tilshisi.
Oblys ákimi orynbasarynyń aıtýynsha, óńirdegi provızorlyq oryndardyń 15 paıyzyna naýqastardy qabyldaýǵa bolady. Al, Túrkistan oblysyndaǵy 300 provızorlyq oryn kómek retinde Shymkent qalasyndaǵy naýqastarǵa berilgen.
«Óńirdegi 124 jedel járdem kóliginiń 85-i ÓJJ apparattarymen qamtylyp otyr. Al, jalpy aýrýhanalarda 178 ÓJJ apparaty bar. Budan bólek, 10 kompıýterlik tomografııa jumys istep tur. Oblys ortalyǵynda 440 provızorlyq oryn bar. Koronavırýs indeti anyqtalǵan naýqastar Kentaý qalasyna 80 oryndyq ınfektsııalyq aýrýhanaǵa jatqyzylýda. Túrkistan oblysynda búgingi tańda 1974 adam pnevmonııa dertine shaldyqqan, onyń 1677-si orta deńgeıde», - dedi oblys ákiminiń orynbasary.
Sáken Qalqamanov sonymen qatar tikeleı efır kezinde turǵyndardy mazalaǵan saýaldarǵa jaýaptar berdi.
«Aýrýhanalarda oryn joq, dári-dármek tapshy degen másele týyndasa, 109 call-ortalyǵyna qońyraý shalyp, naqty jaýap alýǵa bolady. Oblysta dári qory kúndelikti tolyqtyrylyp otyrady. Dári tapshylyǵy turǵyndardyń jappaı dári-dármekti kóptep satyp alyp jatqanynan týyndap jatyr. Sondaı-aq, shalǵaıdaǵy aýyldarda jedel járdem shaqyrý máselesi sheshilgen. Aýyldyq ne aýdandyq bólimshelerdegi mamandar 30 mınýtta jetýine múmkindik bar», - dedi oblys ákiminiń orynbasary.
