TÚRKІSTAN. QazAqparat-Túrkistan oblysy aýmaǵynda krımınogendik ahýal tolyǵymen baqylaýda. Bul týraly barlyq quqyq qorǵaý organdary basshylarynyń qatysýymen shuǵyl shtab ótkizgen oblys ákimi Ómirzaq Shókeev málimdedi,dep habarlaıdy QazAqparat tilshisi.
Oblys basshysy Túrkistan oblysy turǵyndarynyń qaýipsizdigin qamtamasyz etý maqsatyndaǵy jumystar kúsheıtiletinin aıtty. «5 qańtar kúni Memleket basshysynyń Jarlyǵymen jáne QR Konstıtýtsııasynyń 44-babyna, «Tótenshe jaǵdaı týraly» QR Zańyna sáıkes, Túrkistan oblysy aýmaǵynda 5 qańtar saǵat 22.00-den bastap 19 qańtar saǵat 00.00-ge deıingi aralyqta tótenshe jaǵdaı engizildi. Atalǵan qujattyń negizinde Túrkistan oblysynyń komendatýrasy qurylyp, oǵan «Tótenshe jaǵdaı týraly» QR Zańymen kózdelgen ókilettikter beriledi. Túrkistan oblysynda jalpy jaǵdaı turaqty dep aıtýǵa bolady»,– dedi Ómirzaq Shókeev. Tótenshe jaǵdaı kezinde bekitilgen ýaqytsha shekteýler jaıly baıandaǵan Túrkistan oblysynyń Bas kommendanty – Túrkistan oblystyq Polıtsııa departamentiniń bastyǵy, general-maıor Qaırat Dálbekov zań buzýshylyqtarǵa jol berýdiń zardaby aýyr ekenin eskertti.
Kommendanttyq saǵat kezinde tańerteń túngi saǵat 23.00-den tańǵy 7.00-ge deıin azamattardyń júrip-turýyna shekteý qoıylǵan. Oblys aýmaǵynda sonyń ishinde aýdandar arasynda kólik quraldarynyń júrip-turýyna shekteýler ornatyldy.
Sondaı-aq Qyzylorda, Jambyl oblystarymen, Shymkent qalasyna kiretin-shyǵatyn joldarǵa, aýdan arasynda blok-beketter qoıyldy. Tótenshe jaǵdaı kezinde azamattardyń jeke qujattary, kólikteri muqııat tekserilýde. Beıbit jınalystar, oıyn-saýyq, sporttyq jáne basqa da buqaralyq is-sharalardy ótkizýge tyıym salynǵan. «Qurmetti oblys turǵyndary quqyq qorǵaý organdary basqa da múddeli jáne atqarýshy bılikpen birge qoǵamdyq qaýipsizdikti saqtaý úshin kúndiz-túni qyzmet atqarýda. Barshańyzdy zań buzýshylyqqa barmaýǵa, tártip saqtap, arandatýshylardyń sózine, is-áreketine ermeýge shaqyramyn! Qandaı da bir máseleńiz bolsa, zań aıasynda sheshý úshin tıisti memelkettik organdardyń kómegine júginýge bolatynyn jetkizemin, – dedi Túrkistan oblystyq Polıtsııa Departamentiniń bastyǵy, general-maıor Qaırat Dálbekov.
