Túrkistan oblysy ákiminiń shyrshasy ótti
NUR-SULTAN. QazAqparat - Jańajyldyq dýmanǵa oblystyń ár túkpirinen kelgen 200-den astam bala qatysty, dep habarlaıdy Túrkistan oblysy ákimdiginiń baspasóz qyzmeti.
Olardyń barlyǵy da – oqý ozattary, shyǵarmashylyq pen sport salasynda jetistikke jetken daryndy búldirshinder, jetimder úıiniń tárbıelenýshileri, múmkindigi shekteýli, ata-ana qamqorlyǵynsyz qalǵan, áleýmettik az qamtylǵan jáne kópbalaly otbasylardan shyqqan úzdik oqýshylar.
Merkelik shyrshaǵa jınalǵan balalarǵa kontserttik baǵdarlama daıarlanyp, oblys ákimi Ómirzaq Shókeev quttyqtaý tilegin jetkizdi.
«Qymbatty balalar, búgin óńirimizdegi ónegeli búldirshinder Jańa jyl shyrshasynyń aınalasyna jınaldy. Jańa jyl, eń aldymen, balalarǵa qýanysh syılaıtyn ǵajaıypqa toly mereke. Sizderdiń jan-jaqty damyǵan bilimdi, parasatty, tulǵa retinde qalyptasyp, jetilýlerińiz úshin memleketimiz barlyq múmkindikter jasap keledi jáne jasaı beretin bolady. Sizder osyndaı erekshe elde ósip kele jatqan baqytty urpaqsyzdar. Barshańyzǵa myqty densaýlyq tileımin. Jańa jyl tek jaqsylyq ákelsin!», – Ómirzaq Shókeev.
Oblys ákiminiń shyrshasyna qatysqan ár bala aımaq basshysynyń qolynan noýtbýk, qystyq kıimder men tátti syılyqtar alyp, Aıaz atanyń qorjynynan dám tatyp, máre-sáre boldy. Sondaı-aq, oblys ákimi Ómirzaq Estaıulymen birge oblystyq máslıhat hatshysy Qaırat Balabıev, «Nur Otan» partııasy oblystyq fılıaly tóraǵasynyń birinshi orynbasary Beısen Tájibaev bastaǵan el azamattary shyrshany aınala án aıtyp, kóńil kóterdi. Jas órender ónerlerin ortaǵa salyp, teatrlandyrylǵan qoıylymdar búldirshinderge ertegi álemine engendeı áser qaldyrdy. Jańa jyldyq meıramǵa kelgen balalar oblys ákimimen estelikke sýretke tústi.
