Túrkistan oblysy ákiminiń orynbasary sybaılas jemqorlyqtyń oryn alý sebepterin aıtty
«Adamı faktorlar, oblysta halyq sanynyń kóp bolýy jáne memlekettik qyzmetshiler jalaqysynyń tómendigi sybaılas jemqorlyqtyń týyndaýyna negiz bolyp otyr dep oılaımyn. Osy faktorlardy joıý maqsatynda óńirde birqatar sharalar qabyldanyp, qarqyndy jumys atqarylady. Memlekettik qyzmetshiler Prezıdenttiń joldaýyn tyńdap, qýanyp qaldy. Kelesi jyldan bastap oblys ákimshilikteri baldyq júıege ótedi. Bir jyl buryn osy júıe Shymkentte engizilgen. Memlekettik qyzmetshilerdiń jalaqylary kóbeıgen jaǵdaıda jemqorlyq faktileri de azaıady dep sanaımyn», - deıdi Sáken Qalqamanov.
Onyń aıtýynsha, oblys boıynsha 2015-2017 jyldar aralyǵynda memlekettik turǵyn úıge muqtaj azamattar kezeginde turǵan otbasylarǵa 5841 páter berildi.
«Onyń ishinde Shymkent qalasynda 3966 páter berildi. 336 páter jekeshelendirildi. 2018 jyldyń qorytyndysy boıynsha, oblysymyzda turǵyn úı kezegine tirkelgen 29 myńnan astam azamat bar. Bıyl tek qana Túrkistan qalasynda 2000-nan astam páter, al Kentaý qalasynda osy jyldyń aıaǵyna deıin 600 páter tapsyrylatyn bolady. Jumys barysy jiti baqylanýda», - deıdi ol.
